మెదక్ జిల్లా పాపన్నపేట మండల కేంద్రంలో దారుణ ఘటన ఆలస్యంగా వెలుగులోకి వచ్చింది. బడిలో విద్యాబుద్ధులు నేర్పించాల్సిన ఓ ఉపాధ్యాయుడు విద్యార్థినుల పట్ల అసభ్యకరంగా ప్రవర్తించినట్లు ఆరోపణలు వెలువడ్డాయి. గత ఏడాది కాలంగా సదరు ఉపాధ్యాయుడి వేధింపులు భరిస్తున్న బాలికలు చివరకు ధైర్యం చేసి 1098 చైల్డ్ హెల్ప్లైన్కు ఫిర్యాదు చేయడం స్థానికంగా తీవ్ర కలకలం రేపింది.
పాపన్నపేట జిల్లా పరిషత్ ఉన్నత పాఠశాలలో తెలుగు ఉపాధ్యాయుడిగా పనిచేస్తున్న నరసింహులు 9, 10 తరగతులు చదువుతున్న బాలికలతో అనుచితంగా ప్రవర్తించినట్లు ఆరోపణలు ఉన్నాయి. విద్యార్థినులను అవమానకరంగా మాట్లాడటం, అసభ్యకరంగా ప్రవర్తించడం, మార్కులు తగ్గిస్తానంటూ బెదిరించడం వంటి చర్యలకు పాల్పడినట్లు ఫిర్యాదులో పేర్కొన్నట్లు సమాచారం. దీంతో విద్యార్థినులు తీవ్ర భయాందోళనకు గురైనట్లు తెలుస్తోంది.
ఉపాధ్యాయుడి వేధింపులు భరించలేక విద్యార్థినులే స్వయంగా చైల్డ్ హెల్ప్లైన్ను ఆశ్రయించడంతో విషయం వెలుగులోకి వచ్చింది. ఘటనపై అధికారులు విచారణ చేపట్టి, ఆరోపణలు నిజమని తేలితే బాధ్యుడిపై కఠిన చర్యలు తీసుకోవాలని విద్యార్థినుల తల్లిదండ్రులు, స్థానికులు డిమాండ్ చేస్తున్నారు. విద్యార్థులకు సురక్షితమైన వాతావరణం కల్పించడం పాఠశాల యాజమాన్యం, సంబంధిత అధికారుల బాధ్యత అని వారు పేర్కొంటున్నారు.