భారత రాజ్యాంగంలో స్పష్టమైన నిబంధనలు ఉన్నప్పటికీ.. గత 76 ఏళ్లలో న్యాయశాస్త్రంలో అపారమైన పరిజ్ఞానం ఉన్న ఒక్క విద్యావేత్తను కూడా సుప్రీంకోర్టు న్యాయమూర్తిగా నియమించకపోవడం శోచనీయమని సుప్రీంకోర్టు న్యాయమూర్తి జస్టిస్ ఉజ్జల్ భూయాన్ అభిప్రాయపడ్డారు. ఢిల్లీలోని నేషనల్ లా యూనివర్సిటీ 13వ స్నాతకోత్సవంలో ముఖ్య అతిథిగా పాల్గొన్న ఆయన ఈ వ్యాఖ్యలు చేశారు.
న్యాయశాస్త్రంపై లోతైన అవగాహన కలిగిన విద్యావేత్తలు, న్యాయ పండితులను కూడా న్యాయమూర్తులుగా నియమించే అంశాన్ని పరిశీలించాల్సిన అవసరం ఉందని జస్టిస్ ఉజ్జల్ భూయాన్ పేర్కొన్నారు. న్యాయ రంగంలో విస్తృతమైన పరిజ్ఞానం, పరిశోధన అనుభవం ఉన్నవారు న్యాయవ్యవస్థలోకి వస్తే సుప్రీంకోర్టు మరింత వైవిధ్యభరితంగా మారుతుందని అన్నారు.
ఇలాంటి నియామకాల వల్ల న్యాయనిర్ణయ ప్రక్రియ మరింత బలోపేతం అవుతుందని జస్టిస్ భూయాన్ అభిప్రాయపడ్డారు. న్యాయవ్యవస్థలో విభిన్న అనుభవాలు, దృక్పథాలకు ప్రాతినిధ్యం లభించడం వల్ల న్యాయపరమైన అంశాలను మరింత సమగ్రంగా పరిశీలించే అవకాశం ఉంటుందని పేర్కొన్నారు. ఆయన చేసిన ఈ వ్యాఖ్యలు న్యాయవర్గాల్లో చర్చనీయాంశంగా మారాయి.