హైదరాబాద్ నగరంలో సోమవారం (జూన్ 8) పలు ప్రాంతాల్లో ట్రాఫిక్ ఆంక్షలు, మళ్లింపులు అమలులో ఉండనున్నాయి. జూబ్లీహిల్స్ చెక్పోస్ట్, కేబీఆర్ పార్క్ ఎంట్రెన్స్, ముగ్ధ జంక్షన్ పరిసరాల్లో స్టీల్ ఫ్లైఓవర్, అండర్పాస్ నిర్మాణ పనులు జరుగుతున్న కారణంగా ఈ మార్గంలో భారీగా ట్రాఫిక్ జామ్ అయ్యే అవకాశం ఉందని ట్రాఫిక్ పోలీసులు తెలిపారు. ఈ రూట్లలో ప్రయాణించే వాహనదారులు రోడ్ నంబర్ 2, బంజారాహిల్స్ వైపు వెళ్లేందుకు ముందే ప్రత్యామ్నాయ మార్గాలను ఎంచుకోవాలని సూచించారు.
నాంపల్లి ఎగ్జిబిషన్ గ్రౌండ్స్లో వార్షిక చేప ప్రసాదం పంపిణీ (మృగశిర కార్తె) కార్యక్రమం సందర్భంగా సోమవారం ఉదయం 6 గంటల నుంచి మంగళవారం రాత్రి 8 గంటల వరకు నాంపల్లి, దాని చుట్టుపక్కల ప్రాంతాల్లో భారీగా ట్రాఫిక్ ఆంక్షలు విధించారు. దేశవ్యాప్తంగా వివిధ ప్రాంతాల నుంచి భారీ సంఖ్యలో ప్రజలు తరలివస్తున్నందున ఈ మార్గంలో ట్రాఫిక్ మళ్లింపులు ఉంటాయని పోలీసులు ప్రకటించారు. ప్రయాణికులు గాంధీ భవన్, గృహకల్ప బస్ స్టాప్లను ఉపయోగించుకోవాలని, ఆటోల్లో వచ్చే వారి కోసం షెజాన్ హోటల్ వద్ద ప్రత్యేక డ్రాప్-ఆఫ్ పాయింట్లను ఏర్పాటు చేసినట్లు వెల్లడించారు.
మరోవైపు మియాపూర్ బస్ స్టాప్ సమీపంలో ముఖ్యమంత్రి చేతుల మీదుగా నూతన ఫ్లైఓవర్ శంకుస్థాపన కార్యక్రమం జరగనుంది. ఈ నేపథ్యంలో సోమవారం సాయంత్రం 4:30 నుంచి రాత్రి 9 గంటల వరకు ముంబై జాతీయ రహదారి (NH-65) తో పాటు మియాపూర్ పరిసర ప్రాంతాల్లో తీవ్రమైన ట్రాఫిక్ రద్దీ ఉంటుందని సైబరాబాద్ ట్రాఫిక్ పోలీసులు హెచ్చరించారు. ఈ మార్గంలో ప్రయాణించే వారు ముందుగానే ప్లాన్ చేసుకుని, ప్రత్యామ్నాయ దారుల్లో వెళ్లడం ద్వారా ట్రాఫిక్ చిక్కుల నుంచి బయటపడవచ్చని అధికారులు సూచించారు.