మానవ నియంత్రణ లేకుండా పనిచేసే ‘కిల్లర్ రోబోలు’ మానవాళికి తీవ్రమైన ముప్పుగా మారే ప్రమాదం ఉందని ఐక్యరాజ్యసమితి ప్రధాన కార్యదర్శి ఆంటోనియో గుటెర్రెస్ హెచ్చరించారు. కృత్రిమ మేధ (AI) ఆధారంగా పనిచేసే ఆటోమేటిక్ ఆయుధ వ్యవస్థలను తక్షణమే నిషేధించే దిశగా ప్రపంచ దేశాలు చర్యలు తీసుకోవాలని ఆయన పిలుపునిచ్చారు.
శాస్త్రసాంకేతిక రంగంలో వేగంగా జరుగుతున్న మార్పులతో యుద్ధ విధానాలు కూడా పూర్తిగా మారిపోతున్నాయని గుటెర్రెస్ పేర్కొన్నారు. ముఖ్యంగా మానవ జోక్యం లేకుండా లక్ష్యాలను గుర్తించి దాడులు చేసే స్వయంచాలక ఆయుధ వ్యవస్థలు భవిష్యత్తులో తీవ్రమైన భద్రతా సవాళ్లకు దారితీసే అవకాశం ఉందని ఆందోళన వ్యక్తం చేశారు.
ఈ తరహా ఆయుధాలను సమర్థవంతంగా నియంత్రించకపోతే మానవ ప్రాణాలకు, అంతర్జాతీయ భద్రతకు, ప్రపంచ శాంతికి తీవ్రమైన ముప్పు వాటిల్లే ప్రమాదం ఉందని ఆయన హెచ్చరించారు. కాబట్టి కిల్లర్ రోబోల అభివృద్ధి, వినియోగంపై అంతర్జాతీయ స్థాయిలో స్పష్టమైన నిబంధనలు రూపొందించి, అవసరమైతే పూర్తిస్థాయిలో నిషేధించాలని ప్రపంచ దేశాలకు సూచించారు.