దేశవ్యాప్తంగా పోటీ పరీక్షల్లో వరుసగా వెలుగుచూస్తున్న ప్రశ్నపత్రాల లీకేజీలను అరికట్టేందుకు కేంద్ర ప్రభుత్వం కఠిన చర్యలకు సిద్ధమవుతోంది. విద్యార్థుల భవిష్యత్తుతో చెలగాటమాడే పేపర్ లీక్ ముఠాలపై మరింత ప్రభావవంతంగా చర్యలు తీసుకునేందుకు ప్రస్తుతం అమల్లో ఉన్న పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ఫెయిర్ మీన్స్) చట్టం-2024లో కీలక సవరణలు తీసుకురావాలని కేంద్రం యోచిస్తున్నట్లు సమాచారం.
ప్రస్తుతం అమల్లో ఉన్న చట్టం ప్రకారం ప్రశ్నపత్రాల లీకేజీ వంటి అక్రమాలకు పాల్పడిన వారికి 3 నుంచి 5 సంవత్సరాల వరకు జైలు శిక్షతో పాటు రూ.10 లక్షల వరకు జరిమానా విధించే అవకాశం ఉంది. అయితే ప్రతిపాదిత సవరణల ప్రకారం పేపర్ లీక్లలో కీలక పాత్ర పోషించిన వ్యక్తులు, సంఘటిత ముఠాలకు 5 నుంచి 10 సంవత్సరాల వరకు జైలు శిక్షతో పాటు రూ.1 కోటి వరకు జరిమానా విధించేలా నిబంధనలను మరింత కఠినతరం చేయాలని ప్రభుత్వం భావిస్తోంది.
అంతేకాకుండా పరీక్షల నిర్వహణలో భాగస్వామ్యమయ్యే ప్రైవేట్ సంస్థలు లేదా సర్వీస్ ప్రొవైడర్లు అక్రమాలకు పాల్పడితే భారీ జరిమానాలతో పాటు వారి ఆస్తులను కూడా స్వాధీనం చేసుకునే నిబంధనలు తీసుకురావచ్చని సమాచారం. పోటీ పరీక్షలపై విద్యార్థుల్లో విశ్వాసాన్ని పెంపొందించడంతో పాటు పేపర్ లీక్లకు పూర్తిస్థాయిలో అడ్డుకట్ట వేయడమే ఈ చర్యల ప్రధాన లక్ష్యంగా కేంద్ర ప్రభుత్వం భావిస్తోంది.