పశ్చిమాఫ్రికాలోని నైజర్ దేశంలో సహారా ఎడారి నడిబొడ్డున ఘోర విషాదం చోటుచేసుకుంది. ఎడారి గుండా ప్రయాణిస్తున్న ఒక ట్రక్కు మార్గమధ్యంలో చెడిపోవడంతో, తాగేందుకు చుక్క నీరు దొరక్క దాహంతో అలమటిస్తూ ఏకంగా 49 మంది ప్రాణాలు కోల్పోయారు. ప్రపంచంలోనే అత్యంత కఠినమైన వాతావరణ పరిస్థితులు ఉండే ఈ ప్రాంతంలో జరిగిన ఈ హృదయ విదారక ఘటన సర్వత్రా తీవ్ర దిగ్భ్రాంతిని కలిగించింది.
అధికారుల వివరాల ప్రకారం.. ప్రాణాలు కోల్పోయిన వారంతా నైజర్ దేశానికి చెందిన పౌరులు. వీరు పొరుగు దేశమైన మాలీలో జరిగిన ఒక మతపరమైన పండుగలో పాల్గొని తిరిగి తమ స్వదేశానికి ట్రక్కులో బయలుదేరారు. అస్సామాకా ప్రాంతానికి సుమారు 80 కిలోమీటర్ల దూరంలో, కనీస నీటి వనరులు కానీ, జనావాసాలు కానీ లేని నిర్జన ఎడారిలో వీరు ప్రయాణిస్తున్న వాహనం సాంకేతిక లోపంతో ఆగిపోయింది. డ్రైవర్, ప్రయాణికులు దాన్ని బాగు చేయడానికి చేసిన ప్రయత్నాలు ఫలించకపోవడంతో, మండే ఎండలో రోజుల తరబడి సహాయం కోసం ఎదురుచూస్తూ ఆకలి, దాహంతో ఒక్కొక్కరుగా ప్రాణాలు విడిచారు.
అయితే, ప్రాణాల మీద ఆశతో ఇద్దరు వ్యక్తులు అత్యంత సాహసోపేతంగా 50 కిలోమీటర్లకు పైగా కాలినడకన ఎడారిలో ప్రయాణించి ఒక నీటి వనరు వద్దకు, ఆ తర్వాత సమీప పట్టణానికి చేరుకుని అధికారులకు సమాచారం అందించారు. వారు ఇచ్చిన సమాచారంతో రెస్క్యూ బృందాలు ఘటనా స్థలానికి చేరుకోగా, అప్పటికే చెడిపోయిన ట్రక్కు కింద, చుట్టుపక్కల ప్రాంతాల్లో డజన్ల కొద్దీ మృతదేహాలు చెల్లాచెదురుగా పడి ఉండటం వారిని సైతం కంటతడి పెట్టించింది. మృతులను అక్కడే సామూహికంగా ఖననం చేశామని, ఎడారిలో ఉన్న ప్రతికూల పరిస్థితులే ఇంతటి భారీ ప్రాణనష్టానికి కారణమయ్యాయని అధికారులు వెల్లడించారు.