తెలంగాణలో మహిళలకు ఎంతో ప్రతిష్టాత్మకంగా అమలు చేస్తున్న ఉచిత బస్సు ప్రయాణ పథకం (మహాలక్ష్మి స్కీమ్) నిబంధనల్లో ప్రభుత్వం కీలక మార్పులు చేయబోతోంది. ఇప్పటివరకు ఆర్టీసీ బస్సుల్లో మహిళలు తమ ఆధార్ కార్డు లేదా రేషన్ కార్డు వంటి గుర్తింపు కార్డులను చూపిస్తూ ఉచితంగా ప్రయాణిస్తున్న సంగతి తెలిసిందే. అయితే, ఇకపై ఈ విధానానికి స్వస్తి పలకాలని ప్రభుత్వం నిర్ణయించింది. కేవలం గుర్తింపు కార్డులు చూపించి ప్రయాణించే పద్ధతి స్థానంలో సరికొత్త ‘స్మార్ట్ కార్డు’ (Zero Ticket Smart Card) విధానాన్ని పూర్తిస్థాయిలో తీసుకురావడానికి ఆర్టీసీ అధికారులు కసరత్తు వేగవంతం చేశారు.
ఈ కొత్త నిబంధన ప్రకారం.. ఉచిత బస్సు సౌకర్యాన్ని వినియోగించుకోవాలనుకునే మహిళలు ప్రభుత్వం జారీ చేసే ప్రత్యేక స్మార్ట్ కార్డును తప్పనిసరిగా కలిగి ఉండాలి. బస్సు ఎక్కిన తర్వాత కండక్టర్ వద్ద ఉన్న ఈ-పిఓఎస్ (e-POS) మిషన్ ద్వారా ఈ స్మార్ట్ కార్డును స్కాన్ చేసి జీరో టికెట్ తీసుకోవాల్సి ఉంటుంది. స్మార్ట్ కార్డు లేని పక్షంలో మహిళలైనా సరే సాధారణ ప్రయాణికుల్లాగే డబ్బులు చెల్లించి టికెట్ కొనుగోలు చేయాల్సి వస్తుందని అధికారులు స్పష్టం చేస్తున్నారు. ఆధార్ కార్డుల దుర్వినియోగాన్ని అరికట్టడానికి, ప్రయాణిస్తున్న మహిళల ఖచ్చితమైన సంఖ్యను సేకరించడానికి ఈ నిర్ణయం తీసుకున్నట్లు తెలుస్తోంది.
ప్రభుత్వం త్వరలోనే ఈ స్మార్ట్ కార్డుల జారీ ప్రక్రియను రాష్ట్రవ్యాప్తంగా ప్రారంభించనుంది. మహిళలు తమ ఆధార్ కార్డు, స్థానిక గుర్తింపు పత్రాలను సమర్పించి ఆన్లైన్ లేదా నిర్దేశిత కేంద్రాల ద్వారా ఈ కార్డుల కోసం దరఖాస్తు చేసుకోవాల్సి ఉంటుంది. ఈ విధానం వల్ల ఆర్టీసీపై పడుతున్న ఆర్థిక భారాన్ని ప్రభుత్వం ఖచ్చితంగా లెక్కగట్టడానికి వీలవుతుందని, రీఇంబర్స్మెంట్ ప్రక్రియ మరింత పారదర్శకంగా మారుతుందని అధికారులు భావిస్తున్నారు. అయితే సామాన్య, గ్రామీణ మహిళలకు ఈ స్మార్ట్ కార్డుల జారీ ప్రక్రియపై అవగాహన కల్పించాల్సిన బాధ్యత ప్రభుత్వంపై ఎంతైనా ఉంది.