గజపతి జిల్లా గుసాని సమితి పర్లాఖెముండి పట్టణ ఆదర్శ ఠాణా పరిధిలోని అమర గ్రామ ప్రాంతంలో నదిలో గల్లంతైన వృద్ధుడి మృతదేహం లభ్యమైంది. శ్రీకాకుళం జిల్లా తిడ్డీమి గ్రామానికి చెందిన దుర్గా ప్రసాద్ పాణిగ్రాహి (60) శనివారం నదిలో స్నానానికి వెళ్లి గల్లంతయ్యారు. ఆదివారం అగ్నిమాపక సిబ్బంది మృతదేహాన్ని గుర్తించారు.
అగ్నిమాపక అధికారి ధీరేంద్ర కుమార్ దాస్ తెలిపిన వివరాల ప్రకారం.. పాణిగ్రాహి గల్లంతైన విషయం తెలుసుకున్న సిబ్బంది నదిలో సహాయక చర్యలు చేపట్టారు. సుమారు 30 గంటల పాటు గాలింపు చర్యలు నిర్వహించిన అనంతరం మృతదేహాన్ని కనుగొన్నారు. దీంతో కుటుంబ సభ్యులు, స్థానికులు విషాదంలో మునిగిపోయారు.
మృతుడు అమర గ్రామ ప్రాంతంలోని లలితాదేవి ఆలయంలో పూజారిగా సేవలందిస్తున్నట్లు తెలిసింది. నదిలో గల్లంతైన ఆయన మృతదేహాన్ని అగ్నిమాపక సిబ్బంది వెలికితీసి, పోస్టుమార్టం నిమిత్తం జిల్లా ప్రధాన ఆసుపత్రికి తరలించారు. ఘటనపై పోలీసులు వివరాలు సేకరిస్తున్నారు.