తిరుమల శ్రీవారి ఆలయంలో వార్షిక బ్రహ్మోత్సవాల సందడి మొదలైంది. ఈ నెల 15వ తేదీ నుంచి ప్రారంభం కానున్న సాలకట్ల బ్రహ్మోత్సవాలకు టీటీడీ అధికారులు ఏర్పాట్లు ముమ్మరం చేశారు. బ్రహ్మోత్సవాలను పురస్కరించుకుని శ్రీవారి ఆలయంలో కోయిల్ ఆళ్వార్ తిరుమంజనం కార్యక్రమాన్ని శాస్త్రోక్తంగా నిర్వహించారు.
ఈ సందర్భంగా మహాద్వారం నుంచి ఆనంద నిలయం వరకు ఆలయ పరిసరాలను సుగంధ ద్రవ్యాలతో శుద్ధి చేశారు. ఆలయ శుద్ధి కార్యక్రమం పూర్తయిన అనంతరం శ్రీవారికి ప్రత్యేక పూజలు నిర్వహించారు. బ్రహ్మోత్సవాల సమయంలో ఎలాంటి ఇబ్బందులు లేకుండా ఆలయ పరిసరాలను పవిత్రంగా, పరిశుభ్రంగా సిద్ధం చేశారు.
కోయిల్ ఆళ్వార్ తిరుమంజనం సందర్భంగా ఉదయం నుంచి శ్రీవారి దర్శనాన్ని టీటీడీ అధికారులు తాత్కాలికంగా నిలిపివేశారు. ఆలయ శుద్ధి, ప్రత్యేక పూజలు పూర్తయిన అనంతరం భక్తులకు దర్శనాన్ని పునరుద్ధరించారు. బ్రహ్మోత్సవాల నేపథ్యంలో తిరుమలలో భక్తుల రద్దీ పెరిగే అవకాశం ఉండటంతో టీటీడీ అధికారులు అన్ని ఏర్పాట్లను పూర్తి చేస్తున్నారు.