జనగామ జిల్లా కేంద్రంలోని బాణాపురం శ్రీ వెంకటేశ్వరస్వామి దేవాలయంలో తృతీయ పుష్కర మహోత్సవాలు శనివారం సాయంత్రం వైభవంగా ప్రారంభమయ్యాయి. వేడుకల సందర్భంగా ఆలయం భక్తులతో కళకళలాడగా, ఆధ్యాత్మిక వాతావరణం నెలకొంది.
సాయంత్రం 4:30 గంటలకు జనగామకు చేరుకున్న శ్రీ శ్రీ శ్రీ త్రిదండి చిన్న జీయర్ స్వామికి భక్తులు ఘన స్వాగతం పలికారు. జనగామ మున్సిపల్ చైర్పర్సన్ శ్రీమతి కడకంచి బాలమణి, శ్రీ కడకంచి శ్రీనివాస్తో పాటు పలువురు ప్రజాప్రతినిధులు, ప్రముఖులు ఈ కార్యక్రమంలో పాల్గొన్నారు.
డప్పు చప్పుళ్లు, డోలు విన్యాసాలు, మహిళల కోలాట నృత్యాల నడుమ చౌరస్తా నుంచి దేవాలయం వరకు శోభాయాత్రను నిర్వహించారు. భారీ సంఖ్యలో భక్తులు పాల్గొని స్వామివారిని దర్శించుకుని ప్రత్యేక పూజల్లో పాల్గొన్నారు.