సిద్దిపేట జిల్లా గజ్వేల్ నియోజకవర్గంలో ఒక గ్రామం మద్యం మహమ్మారిని తరిమికొట్టేందుకు సంచలన నిర్ణయం తీసుకుంది. మాజీ ముఖ్యమంత్రి కేసీఆర్ ఇలాఖా అయిన గజ్వేల్ మండల పరిధిలోని మక్త మాసాన్ పల్లి గ్రామస్తులు తమ ఊరిలో సంపూర్ణ మద్యపాన నిషేధాన్ని విధిస్తూ ఏకగ్రీవ తీర్మానం చేశారు. ఇకపై గ్రామంలో ఎవరైనా మద్యం అమ్మినా, లేదా కొనుగోలు చేసినా వారికి ఏకంగా రూ.5 లక్షల భారీ జరిమానా విధిస్తామని ఊరి రచ్చబండ సాక్షిగా కఠిన నిబంధనను తీసుకువచ్చారు.
గ్రామంలో రోజురోజుకూ పెరిగిపోతున్న మద్యపాన అలవాటు వల్ల ఎన్నో అనర్థాలు జరుగుతున్నాయని గ్రామస్తులు ఆవేదన వ్యక్తం చేశారు. కొందరు నిత్యం మద్యం మత్తులో ఇళ్లకు వచ్చి భార్యాపిల్లలతో గొడవలు పడుతుండటంతో కుటుంబాలు రోడ్డున పడుతున్నాయని, కాపురాలు కూలిపోయే పరిస్థితి దాపురించిందని మహిళలు ఆందోళన చెందారు. దీనికి తోడు గ్రామానికి చెందిన యువత సైతం ఈ వ్యసనానికి బానిసలై రాత్రి వేళల్లో గొడవలకు దిగుతుండటంతో ఊరిలో ప్రశాంతత కరువైందని గ్రామ పెద్దలు గుర్తించారు.
ఈ భయంకరమైన పరిస్థితులకు చెక్ పెట్టాలని భావించిన మక్త మాసాన్ పల్లి మహిళా సంఘాలు, గ్రామ పెద్దలు, మరియు యువకులు అంతా కలిసికట్టుగా ఒకే తాటిపైకి వచ్చారు. ఈ క్రమంలోనే ఊరి మధ్యలో ప్రత్యేక సమావేశం ఏర్పాటు చేసుకుని ఈ మద్యం నిషేధ నిర్ణయాన్ని ప్రకటించారు. ఎంతటి వారైనా, ఏ స్థాయిలో ఉన్నవారైనా ఈ నియమాన్ని ఉల్లంఘిస్తే ఉపేక్షించేది లేదని, కచ్చితంగా రూ.5 లక్షల ఫైన్ కట్టాల్సిందేనని గ్రామస్తులు ఖరాఖండిగా తేల్చి చెప్పారు. పల్లెల్లో ప్రశాంతత కోసం ఈ గ్రామం తీసుకున్న నిర్ణయం ఇప్పుడు రాష్ట్రవ్యాప్తంగా ఆదర్శంగా నిలుస్తూ చర్చనీయాంశంగా మారింది.