రాష్ట్రవ్యాప్తంగా జరుగుతున్న సమగ్ర సర్వే (ఎన్యూమరేషన్) ప్రక్రియలో ప్రజలు అప్రమత్తంగా ఉండాలని అధికారులు సూచిస్తున్నారు. తమ కుటుంబ వివరాలను కేవలం ఒక్క చోట మాత్రమే నమోదు చేయాలని, పల్లెల్లో ఒకసారి, అలాగే ఉద్యోగ లేదా వ్యాపార రీత్యా నివసిస్తున్న పట్టణాల్లో మరోసారి.. ఇలా రెండు చోట్ల ఎన్యూమరేషన్ పత్రాలు నింపకూడదని స్పష్టం చేశారు. ఎవరైనా ఉద్దేశపూర్వకంగా లేదా అవగాహన లోపంతో ఇలా రెండు చోట్ల వివరాలు నమోదు చేస్తే ఇబ్బందులు ఎదుర్కోవాల్సి వస్తుంది.
సర్వేలో సేకరిస్తున్న డేటాను ఆధార్ నంబర్, రేషన్ కార్డు మరియు ఇతర కీలక గుర్తింపు కార్డులతో అనుసంధానం చేస్తారు. కాబట్టి, ఎవరైనా ఒకే వ్యక్తి లేదా కుటుంబం రెండు వేర్వేరు ప్రాంతాల్లో వివరాలు నమోదు చేసినట్లు ఆధునిక సాఫ్ట్వేర్ ద్వారా సులభంగా బయటపడుతుంది. ఇలా డూప్లికేట్ ఎంట్రీలు చేసినట్లు తేలితే, ఆయా వ్యక్తులకు లేదా కుటుంబ పెద్దకు సంబంధిత అధికారుల నుండి నేరుగా నోటీసులు జారీ చేయబడతాయి. అధికారుల విచారణలో సరైన వివరణ ఇవ్వకపోతే భవిష్యత్తులో ప్రభుత్వ పథకాల లబ్ధికి దూరం అయ్యే ప్రమాదం కూడా ఉంది.
ఈ నేపథ్యంలో ప్రజలు తమ శాశ్వత నివాసం (సొంత ఊరు) లేదా ప్రస్తుతం నివసిస్తున్న ప్రాంతం.. ఈ రెండింటిలో ఏదో ఒక చోట మాత్రమే సర్వే సిబ్బందికి వివరాలు అందించాలని అధికారులు విజ్ఞప్తి చేస్తున్నారు. కుటుంబంలోని కొందరు సభ్యుల వివరాలు ఒకచోట, మరికొందరి వివరాలు మరోచోట ఇవ్వడం కూడా సరైన పద్ధతి కాదు. తప్పులు లేని పక్కా సమాచారాన్ని ప్రభుత్వ రికార్డుల్లో పొందుపరచడానికే ఈ నిబంధనను కఠినంగా అమలు చేస్తున్నారు కాబట్టి, భవిష్యత్తులో ఎలాంటి ఇబ్బందులు రాకుండా ఉండటానికి పౌరులంతా బాధ్యతగా సరైన వివరాలను ఒక్కచోట మాత్రమే నమోదు చేయించుకోవాలి.