తెలంగాణ ప్రభుత్వం రాష్ట్ర ప్రజల సొంతింటి కలను నెరవేర్చే దిశగా మరో బృహత్తర కార్యక్రమానికి శ్రీకారం చుట్టింది. ఇందులో భాగంగా హైదరాబాద్ పరిధిలో ఏకంగా లక్ష ఇళ్ల నిర్మాణాన్ని చేపట్టేందుకు తెలంగాణ హౌసింగ్ బోర్డు కసరత్తు చేస్తోంది. అయితే, ఈ ప్రతిష్టాత్మకమైన కొత్త గృహనిర్మాణ పథకానికి ఒక ఆకర్షణీయమైన, అర్థవంతమైన పేరును ఖరారు చేయాలని అధికారులు భావిస్తున్నారు.
ఈ పథకానికి అధికారులేదో ఒక పేరును నిర్ణయించే బదులు, నేరుగా రాష్ట్ర ప్రజల నుంచే మంచి పేరును సేకరించాలనే వినూత్న ఆలోచనతో హౌసింగ్ బోర్డు ముందుకొచ్చింది. ఇందులో భాగంగా ప్రజల నుంచి పేర్ల కోసం సూచనలను ఆహ్వానిస్తోంది. ప్రజలు పంపించిన పేర్లలో ఈ ప్రతిష్టాత్మక పథకానికి అత్యంత ఖచ్చితంగా సరిపోయే అత్యుత్తమమైన పేరును ఎంపిక చేసి, ఆ పేరును సూచించిన వారికి ఏకంగా లక్ష రూపాయల నగదు బహుమతిని అందజేయనున్నట్లు ప్రభుత్వం అధికారికంగా ప్రకటించింది.
తమ ఆలోచనలకు పదునుపెట్టి ఈ లక్ష రూపాయల బహుమతిని గెలుచుకోవాలని భావించేవారు తమ సృజనాత్మకతను చాటుకోవడానికి ఇదే సరైన సమయం. ఈ పథకానికి మీరు అనుకున్న పేర్లను పంపించడానికి ఈ నెల 28వ తేదీని తుది గడువుగా అధికారులు నిర్ణయించారు. కాబట్టి, ఇంకెందుకు ఆలస్యం, ఆ ఇళ్ల ప్రాజెక్టుకు సరిపోయే ఒక అద్భుతమైన పేరును ఆలోచించి ప్రభుత్వానికి పంపించండి, బహుమతిగా లక్ష రూపాయలు గెలుచుకునే సువర్ణావకాశాన్ని సొంతం చేసుకోండి.