సాధారణ తెల్ల వెల్లుల్లిని నిర్దిష్ట ఉష్ణోగ్రత వద్ద కిణ్వ ప్రక్రియ (Fermentation) చేయడం ద్వారా తయారయ్యే నల్ల వెల్లుల్లి, సాధారణ వెల్లుల్లి కంటే రెట్టింపు పోషకాలను కలిగి ఉంటుందని వైద్య నిపుణులు చెబుతున్నారు. ఇందులో ఉండే ‘ఎస్-అల్లైల్ సిస్టీన్’ (S-allyl cysteine) అనే పదార్థం రక్తంలోని చెడు కొలెస్ట్రాల్ను (LDL) తగ్గించడంలో అద్భుతంగా పనిచేస్తుంది. తద్వారా రక్తనాళాల్లో కొవ్వు పేరుకుపోకుండా నిరోధించి, రక్త ప్రసరణను మెరుగుపరచడం ద్వారా గుండె ఆరోగ్యాన్ని సంరక్షిస్తుంది.
మధుమేహంతో బాధపడేవారికి నల్ల వెల్లుల్లి ఒక గొప్ప వరమని చెప్పవచ్చు. ఇది శరీరంలో ఇన్సులిన్ సెన్సిటివిటీని పెంచి, రక్తంలో చక్కెర స్థాయిలను నియంత్రణలో ఉంచడానికి సహాయపడుతుంది. సాధారణ వెల్లుల్లితో పోలిస్తే ఇందులో యాంటీ ఆక్సిడెంట్లు దాదాపు రెండు నుంచి మూడు రెట్లు ఎక్కువగా ఉండటం వల్ల, ఇది శరీరంలోని ఫ్రీ రాడికల్స్తో పోరాడి కణాల నాశనాన్ని అడ్డుకుంటుంది. ఇది టైప్-2 డయాబెటిస్ వల్ల వచ్చే ఇతర అనారోగ్య సమస్యల తీవ్రతను కూడా తగ్గిస్తుంది.
నల్ల వెల్లుల్లిలో యాంటీ ఇన్ఫ్లమేటరీ గుణాలు అధికంగా ఉండటం వల్ల ఇది రోగనిరోధక శక్తిని పెంచడమే కాకుండా, కాలేయం మరియు మెదడు పనితీరును మెరుగుపరుస్తుంది. పచ్చి వెల్లుల్లిలాగా ఇది ఘాటైన వాసన ఉండదు సదా రుచిలో తియ్యగా, జెల్లీలా ఉంటుంది. అయితే, రక్తాన్ని పల్చబరిచే మందులు వాడేవారు లేదా శస్త్రచికిత్సలు జరగబోయే వారు మాత్రం డాక్టర్ సలహా మేరకే దీనిని తీసుకోవాలి. రోజుకు రెండు లేదా మూడు రెబ్బలు క్రమం తప్పకుండా తీసుకోవడం వల్ల దీర్ఘకాలిక ఆరోగ్య ప్రయోజనాలు పొందవచ్చని వైద్యులు సూచిస్తున్నారు.