ఉత్తరప్రదేశ్లోని యమునా ఎక్స్ప్రెస్వేపై తెల్లవారుజామున ఘోర అగ్నిప్రమాదం జరిగింది. వేగంగా వెళుతున్న ఓ స్లీపర్ టూరిస్ట్ బస్సులో అకస్మాత్తుగా మంటలు చెలరేగడంతో 9 మంది ప్రయాణికులు సజీవ దహనమయ్యారు. ఈ దుర్ఘటనలో పలువురు తీవ్రంగా గాయపడ్డారు.
వివరాల్లోకి వెళితే.. ఈ బస్సు ఢిల్లీ నుంచి ఉత్తరప్రదేశ్లోని మహోబాకు సుమారు 30 మందికి పైగా ప్రయాణికులతో బయలుదేరింది. గ్రేటర్ నోయిడా సమీపంలోకి రాగానే బస్సులో ఒక్కసారిగా మంటలు అంటుకున్నాయి. ప్రమాద సమయంలో ప్రయాణికుల్లో ఎక్కువ మంది గాఢ నిద్రలో ఉండటంతో ఏం జరుగుతుందో తెలుసుకునేలోపే అగ్నికీలలు బస్సును పూర్తిగా చుట్టుముట్టాయి.
భయాందోళనకు గురైన కొందరు ప్రయాణికులు కిటికీల నుంచి బయటకు దూకి ప్రాణాలు కాపాడుకున్నారు. సమాచారం అందుకున్న వెంటనే జేవార్ పోలీసులు, అగ్నిమాపక సిబ్బంది ఘటనా స్థలానికి చేరుకుని సహాయక చర్యలు చేపట్టారు. గాయపడిన వారిని సమీప ఆసుపత్రులకు తరలించారు. అగ్నిప్రమాదానికి గల కచ్చితమైన కారణాలు ఇంకా తెలియరాలేదు.
ఈ ఘటనపై ఉత్తరప్రదేశ్ ముఖ్యమంత్రి యోగి ఆదిత్యనాథ్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు తన ప్రగాఢ సానుభూతిని తెలిపారు. గాయపడిన వారికి మెరుగైన వైద్య సేవలు అందించాలని, మృతుల కుటుంబాలకు అన్ని విధాలా అండగా నిలవాలని అధికారులను ఆదేశించారు. ప్రస్తుతం ఘటనా స్థలంలో సహాయక చర్యలు కొనసాగుతున్నాయి.