అమెరికా-కెనడా మధ్య వాణిజ్య వివాదం మరింత ముదిరింది. చివరి నిమిషంలో జరిగిన చర్చలు విఫలం కావడంతో కెనడియన్ వస్తువులపై అమెరికా కొత్తగా 50 శాతం సుంకాలు విధించేందుకు సిద్ధమవుతున్నట్లు తెలుస్తోంది. దీనికి ప్రతిగా అమెరికా విధించే సుంకాలకు డాలర్కు డాలర్ చొప్పున సమాధానం ఇస్తామని కెనడా హెచ్చరించింది. తాజా పరిణామాలతో ఇప్పటికే ఉద్రిక్తంగా ఉన్న ఇరు దేశాల వాణిజ్య సంబంధాలు మరింత ఒత్తిడికి గురయ్యే పరిస్థితి ఏర్పడింది.
కెనడా ప్రధానమంత్రి మార్క్ కార్నీ చర్చలను నిలిపివేసి, వాషింగ్టన్లో ఉన్న తమ ప్రతినిధి బృందాన్ని వెనక్కి రావాలని ఆదేశించారు. అమెరికా చివరి నిమిషంలో తన ప్రతిపాదిత నిబంధనల్లో మార్పులు చేసిందని ఆయన ఆరోపించారు. కొత్త నిబంధనలు అన్యాయంగా ఉండటంతో పాటు ఆర్థికపరంగా కూడా అసంబద్ధంగా ఉన్నాయని కార్నీ పేర్కొన్నారు.
ఇలాంటి పరిస్థితుల్లో ఇరు దేశాల మధ్య కుదిరే ఏదైనా వాణిజ్య ఒప్పందం విశ్వసనీయతపై ప్రశ్నలు తలెత్తే అవకాశం ఉందని కెనడా ప్రధాని వ్యాఖ్యానించారు. మరోవైపు అమెరికా సుంకాలు అమలు చేస్తే తగిన ప్రతిచర్యలు తీసుకుంటామని కెనడా స్పష్టం చేసింది. దీంతో ఇరు దేశాల మధ్య వాణిజ్య ఉద్రిక్తతలు మరింత పెరిగే అవకాశం ఉందని ఆర్థిక వర్గాలు భావిస్తున్నాయి.