పెద్దపల్లి జిల్లా మంథని నియోజకవర్గంలో అభివృద్ధి పనులు వేగం పుంజుకున్నాయి. బుధవారం నిర్వహించిన కార్యక్రమంలో రాష్ట్ర మంత్రులు దుద్దిళ్ల శ్రీధర్ బాబు, కోమటిరెడ్డి వెంకటరెడ్డి, తుమ్మల నాగేశ్వరరావు పాల్గొని రూ.164 కోట్ల విలువైన పలు అభివృద్ధి పనులకు శంకుస్థాపన చేశారు. ఈ సందర్భంగా మంత్రులు ప్రాంత అభివృద్ధికి ప్రభుత్వం కట్టుబడి ఉందని స్పష్టం చేశారు. మంథని నియోజకవర్గ సమగ్ర అభివృద్ధి కోసం గత రెండేళ్లలో దాదాపు రూ.800 కోట్ల నిధులను ప్రభుత్వం మంజూరు చేసిందని మంత్రి శ్రీధర్ బాబు తెలిపారు.
ఎన్నికల మేనిఫెస్టోలో ఇచ్చిన హామీలను ఒక్కొక్కటిగా అమలు చేస్తున్నామని శ్రీధర్ బాబు పేర్కొన్నారు. గోదావరి నదిపై ప్రతిపాదిత బ్రిడ్జి నిర్మాణానికి అవసరమైన నిధులను కూడా ప్రభుత్వం మంజూరు చేసిందని వెల్లడించారు. మరోవైపు మంత్రి కోమటిరెడ్డి వెంకటరెడ్డి మాట్లాడుతూ మంథని ప్రాంత అభివృద్ధికి రూ.800 కోట్ల నిధులు కేటాయించడం శుభపరిణామమన్నారు. దివంగత మాజీ ప్రధాని పీవీ నరసింహారావు, మాజీ స్పీకర్ శ్రీపాదరావు సేవలను ఈ సందర్భంగా ఆయన స్మరించుకున్నారు.
మంథని యువతకు ఉపాధి, సాంకేతిక శిక్షణ అవకాశాలను పెంచేందుకు రూ.20 కోట్ల వ్యయంతో న్యాక్ (NAC) సెంటర్ను మంజూరు చేసినట్లు కోమటిరెడ్డి వెంకటరెడ్డి తెలిపారు. ఈ కేంద్రం ద్వారా యువతకు నైపుణ్య శిక్షణ అందించడంతో పాటు ఉపాధి అవకాశాలు మెరుగుపడతాయని ప్రభుత్వం భావిస్తోంది. రూ.164 కోట్ల తాజా అభివృద్ధి పనులతో పాటు ఇప్పటికే మంజూరైన నిధులతో మంథని నియోజకవర్గంలో మౌలిక వసతులు మరింత మెరుగుపడనున్నాయని మంత్రులు తెలిపారు.