విజయ డైరీ ఛైర్మన్ పదవి ఇప్పుడు టీడీపీలో కొత్త చర్చకు దారితీస్తోంది. ఛైర్మన్ పదవిని తమకు అనుకూలమైన వారికి ఇవ్వాలంటూ పలువురు ఎమ్మెల్యేలు ప్రతిపాదనలు చేస్తున్నట్లు సమాచారం. ఇప్పటికే చలసాని రాజీనామా వ్యవహారంతో విజయ డైరీ అంశం రాజకీయంగా ప్రాధాన్యం సంతరించుకున్న నేపథ్యంలో, తాజాగా కొత్త ఛైర్మన్ ఎంపిక విషయంలోనూ పార్టీలో పోటీ వాతావరణం నెలకొన్నట్లు తెలుస్తోంది.
విజయ డైరీ ఛైర్మన్ పదవి కోసం పలువురు నేతల పేర్లను ఎమ్మెల్యేలు ప్రతిపాదించినట్లు సమాచారం. పాలడుగు నానికి ఛైర్మన్ పదవి ఇవ్వాలని ఎమ్మెల్యే యార్లగడ్డ వెంకట్రావు ప్రతిపాదించినట్లు తెలుస్తోంది. మరోవైపు అర్జా నగేష్ పేరును ఎమ్మెల్యే కాగిత కృష్ణ ప్రసాద్ సూచించినట్లు సమాచారం. దీంతో ఛైర్మన్ పదవిపై పార్టీలో ఆసక్తికరమైన చర్చ మొదలైంది.
ఇదిలా ఉంటే ప్రస్తుతం డైరెక్టర్గా ఉన్న చక్రవర్తికి ఛైర్మన్ పదవి ఇవ్వాలని మరో ఎమ్మెల్యే ప్రతిపాదించినట్లు తెలుస్తోంది. అలాగే మహిళా డైరెక్టర్కు కూడా ఛైర్మన్ పదవిలో అవకాశం కల్పించాలని మరో ఎమ్మెల్యే సూచించినట్లు సమాచారం. దీంతో విజయ డైరీ పగ్గాలు ఎవరికి దక్కుతాయనే అంశంపై టీడీపీ వర్గాల్లో ఉత్కంఠ నెలకొంది. అయితే తుది నిర్ణయం పార్టీ అధిష్ఠానం, ప్రభుత్వ పెద్దల నిర్ణయంపై ఆధారపడి ఉంటుందని తెలుస్తోంది.