ట్రాఫిక్ నిబంధనలు ఉల్లంఘిస్తూ రాంగ్ రూట్లో దూసుకొచ్చిన ఓ ఆర్టీసీ బస్సు డ్రైవర్కు ఓ బైకర్ చుక్కలు చూపించాడు. దీనికి సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. నిత్యం రద్దీగా ఉండే రోడ్డుపై ఏకంగా ఓ భారీ బస్సును రాంగ్ రూట్లో తీసుకురావడాన్ని గమనించిన సదరు ద్విచక్ర వాహనదారుడు ఏమాత్రం భయపడకుండా, వెనక్కి తగ్గకుండా ఆ బస్సును ధైర్యంగా అడ్డుకున్నాడు.
రాంగ్ రూట్లో వస్తూ తనపైకే దూసుకువస్తున్న బస్సును చూసి పక్కకు తప్పుకోకుండా, ఆ బైకర్ తన వాహనాన్ని నేరుగా బస్సుకు ఎదురుగా నిలిపాడు. బస్సు డ్రైవర్ ఎంత హారన్ కొట్టినా, పక్కకు తప్పుకోవాలని సైగలు చేసినా ఆ బైకర్ ఏమాత్రం చలించలేదు. తప్పు చేసిన డ్రైవర్ వెనక్కి తగ్గాల్సిందేనని, ట్రాఫిక్ రూల్స్ అందరికీ సమానమేనని స్పష్టం చేస్తూ, బస్సు ముందుకు కదలకుండా అలాగే రోడ్డుపై అడ్డుగా నిలబడటం ఈ వీడియోలో స్పష్టంగా కనిపిస్తుంది.
ఈ ఘటనను అక్కడే ఉన్న కొందరు మొబైల్స్లో రికార్డ్ చేసి నెట్టింట పోస్ట్ చేయడంతో అది క్షణాల్లో వైరల్గా మారింది. ఈ వీడియో చూసిన నెటిజన్లు సదరు బైకర్ ధైర్యాన్ని మెచ్చుకుంటూ ప్రశంసల వర్షం కురిపిస్తున్నారు. బాధ్యతాయుతంగా వ్యవహరించాల్సిన ఆర్టీసీ డ్రైవర్లే ఇలా ప్రజల ప్రాణాలతో చెలగాటమాడుతూ, ట్రాఫిక్ నిబంధనలను బేఖాతరు చేయడం పట్ల ఆగ్రహం వ్యక్తం చేస్తూ, సదరు డ్రైవర్పై ట్రాఫిక్ పోలీసులు కఠిన చర్యలు తీసుకోవాలని డిమాండ్ చేస్తున్నారు.