గుంటూరులో రాజకీయ వాతావరణం వేడెక్కింది. వైసీపీకి చెందిన ఎమ్మెల్సీ లేళ్ల అప్పిరెడ్డిని పోలీసులు అరెస్ట్ చేశారు. గుంటూరు సమీపంలోని నల్లపాడు వద్ద రోడ్డుపై ధర్నా చేసి, ప్రభుత్వ విధులకు ఆటంకం కలిగించారన్న ఆరోపణలపై నిన్న అర్ధరాత్రి దాటిన తర్వాత ఆయన్ను అదుపులోకి తీసుకున్నారు.
స్థానిక సంస్థల ఎన్నికల పోలింగ్ అనంతరం వెంగళాయపాలెం నుంచి బ్యాలెట్ బాక్సులను తరలిస్తుండగా ఈ వివాదం మొదలైంది. బ్యాలెట్ బాక్సులను మార్చేందుకు అధికారులు ప్రయత్నిస్తున్నారని ఆరోపిస్తూ వైసీపీ శ్రేణులు నల్లపాడు వద్ద వాహనాన్ని అడ్డుకున్నారు. ఈ క్రమంలోనే ఎమ్మెల్సీ అప్పిరెడ్డి నేతృత్వంలో పార్టీ కార్యకర్తలు రోడ్డుపై బైఠాయించి నిరసనకు దిగారు.
ఈ ఆందోళన కారణంగా గుంటూరు-నల్లపాడు మార్గంలో భారీగా ట్రాఫిక్ స్తంభించిపోయింది. దీంతో అక్కడ తీవ్ర ఉద్రిక్త వాతావరణం నెలకొంది. సమాచారం అందుకున్న పోలీసులు ఘటనా స్థలానికి చేరుకుని, ఆందోళనకారులను చెదరగొట్టారు.
అనంతరం, ప్రభుత్వ విధులకు ఆటంకం కలిగించడం, అనుమతి లేకుండా రహదారిపై ఆందోళన చేపట్టడం వంటి అభియోగాలపై పోలీసులు కేసు నమోదు చేశారు. అర్ధరాత్రి దాటిన తర్వాత అప్పిరెడ్డిని అరెస్ట్ చేసి, నల్లపాడు పోలీస్ స్టేషన్‌కు తరలించారు. రాత్రంతా ఆయనను స్టేషన్‌లోనే ఉంచిన పోలీసులు, ఎలాంటి అవాంఛనీయ ఘటనలు జరగకుండా బందోబస్తు ఏర్పాటు చేశారు.