న్యూజిలాండ్లో గురువారం 6.3 తీవ్రతతో భారీ భూకంపం సంభవించింది. దేశంలోని దక్షిణ ద్వీపం (సౌత్ ఐలాండ్) ఒక్కసారిగా కంపించడంతో ప్రజలు తీవ్ర భయాందోళనకు గురయ్యారు. భూకంప తీవ్రత ఎక్కువగా ఉండటంతో అధికారులు వెంటనే సునామీ హెచ్చరికలు జారీ చేసి, తీర ప్రాంత ప్రజలు అప్రమత్తంగా ఉండాలని సూచించారు.
న్యూజిలాండ్ నేషనల్ ఎమర్జెన్సీ మేనేజ్మెంట్ ఏజెన్సీ (NEMA) వివరాల ప్రకారం, ప్రముఖ పర్యాటక ప్రాంతమైన టె అనావ్ పట్టణానికి సుమారు 40 కిలోమీటర్ల దూరంలో, భూమికి 50 కిలోమీటర్ల లోతులో భూకంప కేంద్రం నమోదైంది. పరిస్థితిని అధికారులు నిరంతరం పర్యవేక్షిస్తున్నారు.
భూకంపం సంభవించిన సమయంలో కొన్ని సెకన్ల పాటు భవనాలు, ఇళ్లు బలంగా కంపించడంతో ప్రజలు ఇళ్ల నుంచి బయటకు పరుగులు తీశారు. ఈ ఘటనలో జరిగిన ప్రాణ, ఆస్తి నష్టానికి సంబంధించిన పూర్తి వివరాలు ఇంకా తెలియరాలేదని అధికారులు తెలిపారు. సహాయక చర్యలు కొనసాగుతుండగా, ప్రజలు అధికారుల సూచనలు తప్పనిసరిగా పాటించాలని విజ్ఞప్తి చేశారు.