రాష్ట్రంలోని అక్వా రైతులను ఆదుకునేందుకు ఆంధ్రప్రదేశ్ ప్రభుత్వం కీలక అడుగులు వేస్తోంది. అందులో భాగంగా, రొయ్యల ఫీడ్ (మేత) ధరలను ఎట్టి పరిస్థితుల్లోనూ పెంచడానికి వీల్లేదని రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు స్పష్టం చేశారు. ఫీడ్ తయారీ కంపెనీలు మరియు వ్యాపారులు సిండికేట్గా మారి ఏకపక్షంగా ధరలు పెంచుతూ రైతులను దోచుకోవాలని చూస్తే ప్రభుత్వం ఏమాత్రం చూస్తూ ఊరుకోదని ఆయన గట్టిగా హెచ్చరించారు.
ఇటీవల కాలంలో రొయ్యల సాగు ఖర్చులు విపరీతంగా పెరిగిపోయి రైతులు తీవ్ర ఆర్థిక ఇబ్బందులు, నష్టాలు ఎదుర్కొంటున్నారు. ముఖ్యంగా అంతర్జాతీయ మార్కెట్లో రొయ్యల ధరలు ఆశాజనకంగా లేని ఈ సమయంలో.. ఇక్కడ ఫీడ్ ధరలు, ఇతర నిర్వహణ ఖర్చులు తడిసి మోపెడవుతుండటంతో అక్వా రంగం సంక్షోభం అంచున నిలిచింది. ఈ పరిస్థితులను చక్కదిద్దేందుకు ప్రభుత్వం ప్రత్యేక దృష్టి సారించిందని, రొయ్యల ఫీడ్ ధరలను కఠినంగా నియంత్రించడం ద్వారా రైతులకు పెట్టుబడి భారాన్ని తగ్గించడమే తమ ప్రధాన లక్ష్యమని మంత్రి వివరించారు.
ఎవరైనా ప్రభుత్వ ఆదేశాలను ఉల్లంఘించి, కృత్రిమ కొరత సృష్టించి ఫీడ్ ధరలు పెంచినట్లు ఫిర్యాదులు వస్తే వారిపై చట్టపరంగా కఠిన చర్యలు తప్పవని అచ్చెన్నాయుడు తేల్చి చెప్పారు. నాణ్యమైన ఫీడ్ సరసమైన ధరలకే రైతులకు అందేలా సంబంధిత శాఖల అధికారులు ఎప్పటికప్పుడు మార్కెట్ను పర్యవేక్షించాలని ఆయన ఆదేశించారు. రాష్ట్రంలో అక్వా రంగాన్ని తిరిగి బలోపేతం చేసి, రైతులను లాభాల బాట పట్టించేందుకు తమ ప్రభుత్వం అన్ని విధాలా అండగా ఉంటుందని ఈ సందర్భంగా ఆయన భరోసా కల్పించారు.