ప్రముఖ నటి త్రిష వ్యక్తిగత జీవితంపై గత కొన్ని రోజులుగా సోషల్ మీడియాలో వస్తున్న వివిధ రకాల రూమర్లపై సీనియర్ నటి ఖుష్బూ సుందర్ తీవ్రంగా మండిపడ్డారు. సెలబ్రిటీల ప్రైవసీని గౌరవించకుండా, తప్పుడు వార్తలు ప్రచారం చేస్తున్న వారిని ఆమె గట్టిగా మందలించారు. ఎదుటివారి వ్యక్తిగత విషయాల్లో జోక్యం చేసుకుంటూ లేనిపోని వదంతులు సృష్టించి, తద్వారా ‘పైశాచిక ఆనందం’ పొందడం అత్యంత విచారకరమని ఆమె అసహనం వ్యక్తం చేశారు.
త్రిష తనకు ఎంతో సన్నిహితురాలని, ఆమె వ్యక్తిగతంగా ఎంతో సంస్కారవంతురాలని ఖుష్బూ కొనియాడారు. చెన్నై వంటి నగరంలో ఇలా ఇతరుల వ్యక్తిగత జీవితాలను దెబ్బతీసే సంస్కృతి పెరిగిపోవడం బాధాకరమని ఆమె పేర్కొన్నారు. రూమర్స్ సృష్టించేవారు ఎదుటివారి గౌరవానికి భంగం కలిగిస్తున్నారని, ఇటువంటి చర్యలను నాగరిక సమాజం అంగీకరించబోదని ఖుష్బూ స్పష్టం చేశారు.
నటుడు విజయ్ రాజకీయ అరంగేట్రం చేస్తున్న నేపథ్యంలో, ఈ తరహా రూమర్స్ ఆయన కెరీర్పై ప్రభావం చూపుతాయా అన్న ప్రశ్నకు ఖుష్బూ ఘాటుగా సమాధానమిచ్చారు. ఒక నాయకుడి వ్యక్తిగత జీవితాన్ని రాజకీయాలతో ముడిపెట్టడం ఎంతమాత్రం సమంజసం కాదని ఆమె తేల్చి చెప్పారు. రాజకీయాల్లోకి వచ్చే వ్యక్తుల ప్రజా సేవను చూడాలి తప్ప, వారి వ్యక్తిగత విషయాలను రాజకీయం చేయడం సరైన పద్ధతి కాదని ఆమె హితవు పలికారు.