తేది:16-03-2026 TSLAWNEWS హైదరాబాద్ ఇంచార్జ్ విజయ్ మురళి కృష్ణ.
హైదరాబాద్: తెలంగాణ రాష్ట్రంలో విద్య హక్కు చట్టం, 2009 లోని సెక్షన్ 12(1)(c) ను పూర్తిస్థాయిలో అమలు చేయాలని కౌన్సిల్ ఫర్ సిటిజన్స్ వాయిస్ (CCV) ప్రభుత్వాన్ని కోరింది.
భారత రాజ్యాంగంలోని ఆర్టికల్ 21-A ప్రకారం 6 నుండి 14 సంవత్సరాల మధ్య వయస్సు గల ప్రతి పిల్లవాడికి ఉచిత మరియు తప్పనిసరి విద్య అందించడం రాష్ట్ర ప్రభుత్వ బాధ్యత అని సంస్థ ప్రతినిధులు పేర్కొన్నారు. ఈ చట్టం ప్రకారం ప్రైవేట్ అన్ఏయిడెడ్ పాఠశాలలు తమ ప్రవేశ స్థాయిలో కనీసం 25% సీట్లను ఆర్థికంగా బలహీన వర్గాలు (EWS) మరియు వెనుకబడిన వర్గాలకు చెందిన పిల్లలకు కేటాయించి ఉచిత విద్య అందించాల్సి ఉంటుందని తెలిపారు.
అయితే తెలంగాణ రాష్ట్రంలోని అనేక ప్రాంతాలలో ఈ నిబంధన పూర్తిస్థాయిలో అమలు కావడం లేదని సంస్థ అభిప్రాయపడింది. దీనివల్ల పేద మరియు వెనుకబడిన వర్గాలకు చెందిన అనేక మంది పిల్లలు నాణ్యమైన విద్యను పొందే అవకాశాన్ని కోల్పోతున్నారని పేర్కొన్నారు.
ఈ నేపథ్యంలో తెలంగాణ ఎడ్యుకేషన్ కమిషన్ చైర్మన్ శ్రీ ఆకునూరి మురళి గారికి ప్రతినిధి పత్రం సమర్పించి, రాష్ట్రంలోని అన్ని ప్రైవేట్ పాఠశాలల్లో సెక్షన్ 12(1)(c) ను కచ్చితంగా అమలు చేయాలని, 25% ఉచిత సీట్ల కోసం పారదర్శకమైన ఆన్లైన్ అడ్మిషన్ విధానాన్ని ఏర్పాటు చేయాలని మరియు చట్టాన్ని ఉల్లంఘించే పాఠశాలలపై చర్యలు తీసుకోవాలని కోరినట్లు తెలిపారు.
వచ్చే విద్యా సంవత్సరానికి ఈ చట్టం పూర్తిస్థాయిలో అమలు అయ్యేలా కౌన్సిల్ ఫర్ సిటిజన్స్ వాయిస్ కృషి చేస్తుందని సంస్థ సభ్యులు తెలిపారు. ఈ కార్యక్రమంలో కే. నరేష్ బాబు, వై. మాధవ రెడ్డి, వెంకటేష్, మల్లేశ్వరరావు, మహేశ్వరరెడ్డి, సురేష్ తదితరులు పాల్గొన్నారు.