భారతదేశం నుంచి మావోయిస్టులను పూర్తిగా ఏరివేసేందుకు కేంద్ర ప్రభుత్వం చేపట్టిన ‘ఆపరేషన్ కగార్’ సత్ఫలితాలను ఇస్తోంది. ఈ క్రమంలో మావోయిస్ట్ పార్టీ కేంద్ర కమిటీ కార్యదర్శి తిప్పిరి తిరుపతి అలియాస్ దేవ్జీ, మంగళవారం తెలంగాణ డీజీపీ శివధర్ రెడ్డి ముందు లొంగిపోయారు. దేవ్జీతో పాటు కీలక నేతలు మల్లా రాజిరెడ్డి, బడే చొక్కారావు, నూనె నర్సింహారెడ్డి కూడా ఆయుధాలు వీడి జనజీవన స్రవంతిలో కలిశారు. అగ్రనేతల లొంగుబాటుతో మావోయిస్ట్ ఉద్యమానికి గట్టి ఎదురుదెబ్బ తగిలిందని పోలీసులు భావిస్తున్నారు.
జగిత్యాల జిల్లా కోరుట్లకు చెందిన తిప్పిరి తిరుపతి, 1980లలో పీపుల్స్వార్ పార్టీ ద్వారా ఉద్యమబాట పట్టారు. రాడికల్ స్టూడెంట్స్ యూనియన్ (RSU) భావజాలంతో ఆకర్షితుడైన ఆయన, అంచలంచెలుగా ఎదుగుతూ పార్టీలో అత్యంత కీలకమైన సెంట్రల్ మిలిటరీ కమిషన్ ఇన్ఛార్జ్గా, పొలిట్ బ్యూరో సభ్యుడిగా బాధ్యతలు నిర్వహించారు. ముఖ్యంగా 2003లో అలిపిరి వద్ద అప్పటి ముఖ్యమంత్రి చంద్రబాబు నాయుడిపై జరిగిన బాంబు దాడిలోనూ, 2010లో దంతెవాడలో 74 మంది సీఆర్పీఎఫ్ జవాన్ల మృతికి కారణమైన దాడుల్లోనూ దేవ్జీ కీలక సూత్రధారిగా వ్యవహరించినట్లు రికార్డులు చెబుతున్నాయి.
దేవ్జీపై తెలంగాణ, ఛత్తీస్గఢ్ రాష్ట్రాల్లో కలిపి సుమారు రూ.కోటి రివార్డు ఉంది. గత రెండేళ్లలో దాదాపు 591 మంది నక్సలైట్లు లొంగిపోయారని, ప్రస్తుతం అజ్ఞాతంలో ఉన్న మరికొందరు నాయకులతో కూడా చర్చలు జరుగుతున్నాయని డీజీపీ వెల్లడించారు. భద్రతా బలగాల ముప్పేట దాడులు, అనారోగ్యం మరియు నాయకత్వ లోపం వంటి కారణాల వల్ల అగ్రనేతలు స్వచ్ఛందంగా లొంగిపోతున్నారని విశ్లేషకులు భావిస్తున్నారు. ఈ పరిణామంతో దేశంలో మావోయిస్టుల ప్రాబల్యం మరింత క్షీణించనుంది.