విలక్షణ నటనతో గుర్తింపు పొందిన వరలక్ష్మి శరత్ కుమార్, ఇప్పుడు దర్శకురాలిగా తన సెకండ్ ఇన్నింగ్స్ ప్రారంభించారు. ఆమె దర్శకత్వం వహించిన మొదటి చిత్రం ‘సరస్వతి’ ట్రైలర్ లాంచ్ వేడుక ఘనంగా జరిగింది. ఈ సందర్భంగా వరలక్ష్మి మాట్లాడుతూ, ఇండస్ట్రీలో నటిగా నిలదొక్కుకోవడం ఒక ఎత్తైతే, ఇప్పుడు దర్శకురాలిగా మారడం మరో సవాల్ అని పేర్కొన్నారు. కనబడకుండా పోయిన కూతురి కోసం ఒక తల్లి చేసే పోరాటమే ఈ సినిమా ప్రధాన ఇతివృత్తమని ఆమె వెల్లడించారు.
ఈ వేడుకలో వరలక్ష్మి తన సినీ కెరీర్ గురించి మాట్లాడుతూ దర్శకుడు గోపీచంద్ మలినేనిపై ప్రశంసలు కురిపించారు. ఆయన తన గురువు, మెంటార్ అని కొనియాడారు. “గోపీచంద్ సార్ నా కెరీర్కు సెకండ్ లైఫ్ ఇచ్చారు. ఆయన ప్రోత్సాహం వల్లే నేను ఈ రోజు ఇక్కడ ఉన్నాను” అంటూ భావోద్వేగానికి గురయ్యారు. చిత్ర పరిశ్రమలో అమ్మాయిలు నిలదొక్కుకోవడం కష్టమని, వారికి సరైన మద్దతు అవసరమని ఆమె ఈ సందర్భంగా కోరారు.
దోసా డైరీస్ బ్యానర్పై రూపొందుతున్న ఈ చిత్రంలో వరలక్ష్మితో పాటు ప్రియమణి, ప్రకాశ్ రాజ్ కీలక పాత్రలు పోషిస్తున్నారు. ఎస్.ఎస్. తమన్ ఈ సినిమాకు సంగీతం అందిస్తున్నారు. వైవిధ్యమైన కథాంశంతో వస్తున్న ‘సరస్వతి’పై ప్రస్తుతం ఇండస్ట్రీలో మంచి అంచనాలు ఉన్నాయి. నటిగా తనకంటూ ఒక మార్కు వేసుకున్న వరలక్ష్మి, ఇప్పుడు మెగాఫోన్ పట్టి దర్శకురాలిగా ఏ మేరకు మెప్పిస్తారో వేచి చూడాలి.