తెలంగాణ మున్సిపల్ ఎన్నికల పోలింగ్కు సమయం దగ్గరపడుతుండటంతో రాజకీయ వాతావరణం సెగలు పుట్టిస్తోంది. ముఖ్యంగా చేవెళ్ల మున్సిపాలిటీలో అభ్యర్థులు ఓటర్లను ప్రలోభపెట్టేందుకు బరితెగిస్తున్నారు. ఓటర్లను తమ వైపు తిప్పుకునేందుకు ఒక అభ్యర్థి ఏకంగా తాను గెలిస్తే ప్రతి ఓటరుకు అర తులం బంగారం ఇస్తానని బహిరంగంగా హామీ ఇవ్వడం రాష్ట్రవ్యాప్తంగా పెను సంచలనం సృష్టిస్తోంది. ప్రజాస్వామ్యంలో ఓటును వస్తువులతో కొలవడంపై మేధావులు, సామాన్యులు తీవ్ర విమర్శలు గుప్పిస్తున్నారు.
హైదరాబాద్ శివార్లలోని ఓఆర్ఆర్ (ORR), రీజినల్ రింగ్ రోడ్ (RRR) పరిధిలోని మున్సిపాలిటీల్లో డబ్బు ప్రవాహం భారీగా ఉన్నట్లు తెలుస్తోంది. ఒక్కో ఓటుకు కనీసం రూ.10 వేల నుంచి రూ.30 వేల వరకు పంపిణీ చేస్తున్నట్లు సమాచారం. రియల్ ఎస్టేట్ మార్కెట్ జోరుగా ఉన్న ప్రాంతాల్లో కౌన్సిలర్ పదవి దక్కించుకునేందుకు అభ్యర్థులు కోట్ల రూపాయలు వెచ్చిస్తున్నారు. కేవలం నగదు మాత్రమే కాకుండా మద్యం, మాంసం విందులతో ఓటర్లను ఆకర్షించే ప్రయత్నాలు ముమ్మరంగా సాగుతున్నాయి.
డబ్బు, బంగారంతో పాటు గృహోపకరణాల పంపిణీ కూడా విచ్చలవిడిగా జరుగుతోంది. టీవీలు, ఫ్రిజ్లు, వాషింగ్ మెషీన్లు, కుక్కర్లు వంటి బహుమతులు ఓటర్ల ఇళ్లకు చేరుతున్నాయి. ఎన్నికల అధికారులు నిఘా పెంచామని చెబుతున్నప్పటికీ, క్షేత్రస్థాయిలో ఈ ప్రలోభాలు యథేచ్ఛగా కొనసాగుతున్నాయి. ఇలా అక్రమంగా డబ్బు ఖర్చు చేసి గెలిచిన వారు భవిష్యత్తులో ప్రజా సేవ కంటే పెట్టిన పెట్టుబడిని వెనక్కి తీసుకోవడానికే ప్రాధాన్యత ఇస్తారని, ఇది ప్రజాస్వామ్యానికే గొడ్డలిపెట్టు అని విశ్లేషకులు ఆందోళన వ్యక్తం చేస్తున్నారు.