గ్లోబల్ స్టార్ రామ్ చరణ్ హీరోగా, బుచ్చిబాబు సానా దర్శకత్వంలో ప్రతిష్ఠాత్మకంగా తెరకెక్కుతున్న చిత్రం ‘పెద్ది’. ఈ సినిమా నుంచి ఇటీవల విడుదలైన ‘చికిరి చికిరి’ పాట యూట్యూబ్లో భారీ రికార్డులను సృష్టిస్తూ దూసుకుపోతోంది. విడుదలైన రోజు నుంచే సంగీత ప్రియులను విశేషంగా ఆకట్టుకున్న ఈ మెలోడీ సాంగ్, తాజాగా 75 మిలియన్లకు పైగా వ్యూస్ను, 1.44 మిలియన్లకు పైగా లైక్స్ను సొంతం చేసుకుంది. ఈ పాట ప్రస్తుతం యూట్యూబ్ మ్యూజిక్ ట్రెండింగ్లో నంబర్ వన్ స్థానంలో కొనసాగుతుండటం విశేషం.
ఈ పాట భారీ విజయం సాధించడానికి ఆస్కార్ విజేత ఏఆర్ రెహమాన్ అందించిన అద్భుతమైన స్వరాలు ప్రధాన కారణం. ఈ అందమైన మెలోడీకి ప్రముఖ గాయకుడు మోహిత్ చౌహాన్ తన మధురమైన గాత్రంతో ప్రాణం పోశారు. బాలాజీ అందించిన సాహిత్యం పాటకు మరింత ఆకర్షణ తీసుకురావడంతో, ఈ పాట ప్రేక్షకులను విపరీతంగా ఆకట్టుకుంది. ‘చికిరి చికిరి’ పాట సాధించిన ఈ ఘన విజయం, రామ్ చరణ్ సినిమా ‘పెద్ది’పై ప్రపంచవ్యాప్తంగా ఉన్న అంచనాలను మరింతగా రెట్టింపు చేసింది.
‘పెద్ది’ చిత్రంలో రామ్ చరణ్ సరసన జాన్వీ కపూర్ హీరోయిన్గా నటిస్తున్నారు. కన్నడ స్టార్ శివ రాజ్కుమార్, జగపతి బాబు, దివ్యేందు శర్మ కీలక పాత్రల్లో కనిపించనున్నారు. మైత్రీ మూవీ మేకర్స్, సుకుమార్ రైటింగ్స్ సమర్పణలో, వృద్ధి సినిమాస్ పతాకంపై వెంకట సతీష్ కిలారు ఈ చిత్రాన్ని నిర్మిస్తున్నారు. రత్నవేలు సినిమాటోగ్రఫీ, నవీన్ నూలి ఎడిటింగ్ అందిస్తున్న ఈ చిత్రాన్ని 2026 మార్చి 27న ప్రపంచవ్యాప్తంగా గ్రాండ్గా విడుదల చేసేందుకు నిర్మాతలు సన్నాహాలు చేస్తున్నారు.