ఏపీలో కూటమి ప్రభుత్వం అధికారంలోకి వచ్చాక నిర్ణయాలు తీసుకోవడంలో వేగంగా అడుగులు వేస్తోంది. ఒకప్పుడు అభివృద్ధిపై దృష్టి పెట్టేవారు సీఎం చంద్రబాబు. ప్రస్తుతం అభివృద్ధితోపాటు సంక్షేమంపైనా ఫోకస్ చేశారు. తాజాగా రేషన్ కార్డుదారులకు ప్రభుత్వం శుభవార్త. బియ్యంతోపాటు తృణ ధాన్యాలను పంపిణీ చేయాలని డిసైడ్ అయ్యింది. జూన్ ఒకటి నుంచి అమలు చేయాలని భావిస్తోంది.
ఏపీ వ్యాప్తంగా హెల్త్ సర్వే చేపట్టింది ప్రభుత్వం. ఏయే జిల్లాల్లో ఎలాంటి సమస్యలు ఉన్నాయో ఇటీవల వివరించారు సీఎం చంద్రబాబు. దానికి సంబంధించి కొన్ని సూచనలు, సలహాలు ఇచ్చారు. ఆరోగ్యమే మహాభాగ్యమని వివరించారు కూడా. సర్వే ఆధారంగా కీలక నిర్ణయాలు తీసుకుంది ప్రభుత్వం.
జూన్ ఒకటి నుంచి రేషన్ కార్డుదారులకు తీపి కబురు చెప్పింది ప్రభుత్వం. రేషన్తోపాటు తృణ ధాన్యాలు పంపిణీ చేయాలని నిర్ణయించుకుంది. అందులో కీలకమైనది రాగులు పంపిణీ చేయాలని భావిస్తోంది. అందుకు అనుగుణంగా అడుగులు వేస్తోంది. రేషన్ బియ్యానికి బదులు రాగులు ఉచితంగా ఇవ్వనుంది.
ప్రతినెలా 20 కిలోల బియ్యం తీసుకుంటున్న రేషన్ కార్డు హోలర్డ్ రెండు కేజీలు రాగులు కావాలని అడిగితే ఇవ్వాలని ప్లాన్ చేస్తోంది. ఇచ్చే బియ్యాన్ని అందులో మినహాయించేలా ఆలోచన చేసింది. రాగులు తీసుకునేవారికి బియ్యం ఎన్ని కేజీలు తగ్గిస్తారనేది ఎక్కడా క్లారిటీ ఇవ్వలేదు. రాగులు ఇవ్వడానికి కారణాలు లేకపోలేదు.
చాలా జిల్లాల్లో ప్రజలు రక్త హీనత సమస్య ఎదుర్కొంటున్నారు. రాగుల వల్ల ఆ సమస్య తగ్గించ వచ్చని భావిస్తోంది. రాగులు తినడం వల్ల బలంగా, ఆరోగ్యంగా ఉంటారని భావిస్తోంది. రాగులు పండించే రైతులకు మేలు చేస్తుంది కూడా. దీనివల్ల రైతులు లాభం పొందుతారు.
రాయలసీమలో రాగులు సాగు ఎక్కువగా చేస్తారు. ఈ క్రమంలో రాష్ట్రవ్యాప్తంగా ఏడాదికి రాగులు ఎంతమేర అవసరం అవుతుందో లెక్క కట్టింది. చివరకు దాదాపు 25 వేల మెట్రిక్ టన్నుల రాగులు కావాలని అధికారులు అంచనా వేశారు. కేంద్రప్రభుత్వం మిల్లెట్స్ వాడమని పదేపదే చెబుతోంది. పేదలకు బియ్యంతోపాటు రాగులను కూడా ఇవ్వాలని నిర్ణయించింది కూటమి సర్కార్.
రాగుల్లో కాల్షియం, ఐరన్, ఫైబర్ వంటి పోషకాలు ఉంటాయి. అమైనో యాసిడ్స్ వీటి సొంతం. ఇవి ఆహారంగా తీసుకోవడం వల్ల చిన్నారుల నుంచి పెద్దల వరకు మరింత బలంగా ఉంటారు. ఎముకలు బలంగా ఉండడమేకాదు షుగర్ లెవెల్స్ కంట్రోల్ అవుతాయని కొందరు వైద్య నిపుణుల మాట. ప్రోటీన్, విటమిన్ బి, థయామిన్, నియాసిన్, రైబోఫ్లావిన్, ఫాస్పరస్, మెగ్నీషియం, పొటాషియం వంటి పోషకాలకు కొదవలేదు.