టాలీవుడ్ అగ్రనటుడు నందమూరి బాలకృష్ణ, డైరెక్టర్ బాబీ దర్శకత్వంలో రూపుదిద్దుకుంటున్న ‘ఎన్‌బీకే 109’ మూవీ టీజర్ వచ్చేసింది. సితార ఎంటర్‌టైన్‌మెంట్ పతాకంపై నాగవంశీ నిర్మిస్తున్న ఈ సినిమాకు ‘డాకు మహారాజ్’గా నామకరణం చేశారు. తాజాగా చిత్రబృందం ఈ మూవీ టీజర్‌ను రిలీజ్ చేసింది.
భగవంత్ కేసరి మూవీ తర్వాత బాలయ్య నుంచి వస్తున్న సినిమా కావడంతో ఈ మూవీపై భారీ అంచనాలున్నాయి. ఫ్యామిలీ ఎంటర్‌టైనర్‌గా రాబోతున్న ఈ సినిమాలో పొలిటికల్ బ్యాక్‌డ్రాప్ నేపథ్యంలో సాగే ఫ్లాష్‌బ్యాక్ ఉంటుందని టీజర్‌ను బట్టి అర్థమవుతోంది.
‘ఈ కథ వెలుగుని పంచే దేవుళ్లది కాదు. చీకటిని శాసించే రాక్షసులది కాదు. ఆ రాక్షసులను ఆడించే రావణుడిదీ కాదు. ఈ కథ రాజ్యం లేకుండా యుద్ధం చేసే ఒక రాజుది. గండ్ర గొడ్డలి పట్టిన యమజధర్మరాజుది. మరణాన్నే వణికించిన మహారాజుది’ అని చెప్పడంతో టీజర్ మొదలైంది. ‘గుర్తుపట్టావా.. డాకు మహారాజ్’ అంటూ బాలయ్య చెప్పే డైలాగ్ ఫ్యాన్స్‌‌కు పూనకాలు తెప్పించేలా ఉన్నాయి.
ఈ మూవీలో బాలయ్య మూడు విభిన్న కోణాల్లో కనిపిస్తాడని టాలీవుడ్ వర్గాలు చెబుతున్నాయి. అలాగే, ముగ్గురు హీరోయిన్లు ఉన్న ఈ మూవీలో ఊర్వశీ రౌతేలా కీలక పాత్రలో కనిపించబోతున్నట్టు సమాచారం. ఈ మూవీలో మలయాళ ఇండస్ట్రీకి చెందిన అగ్రనటుడు నటిస్తున్నట్టు తెలుస్తోంది.