తెలంగాణలో కాంగ్రెస్, బీజేపీ పార్టీలకు షాకింగ్ న్యూస్..? బీఆర్ఎస్ లోకి చేరికలు .

ముధోల్ నియోజకవర్గానికి చెందిన 11 మంది సర్పంచులు బీఆర్ఎస్ పార్టీలో చేరారు. తెలంగాణ భవన్‌లో మంగళవారం బీఆర్ఎస్ వర్కింగ్ ప్రెసిడెంట్ కేటీఆర్ సమక్షంలో, పార్టీ సీనియర్ నాయకురాలు రమాదేవి ఆధ్వర్యంలో ఈ చేరికలు జరిగాయి. కేటీఆర్ వారికి పార్టీ కండువాలు కప్పి సాదరంగా పార్టీలోకి ఆహ్వానించారు. పార్టీలో చేరిన ప్రతి ఒక్కరికీ మంచి భవిష్యత్తు ఉంటుందని భరోసా ఇచ్చారు.

తాండూర్, కుభీర్ మండలాలకు చెందిన సర్పంచుల్లో ఎనిమిది మంది బీజేపీ నుంచి, ఒకరు కాంగ్రెస్ నుంచి, ఇద్దరు స్వతంత్ర అభ్యర్థులుగా గెలుపొందిన వారు ఉన్నారు. ఉపసర్పంచులంతా బీజేపీకి చెందిన వారే. మాజీ ప్రజాప్రతినిధుల్లో గతంలో కాంగ్రెస్‌లో పనిచేసిన నాయకులు కూడా బీఆర్ఎస్‌లో చేరారు. ఈ సందర్భంగా రమాదేవి మాట్లాడుతూ.. ముధోల్ నియోజకవర్గంలో అధికారంలో ఉన్న కాంగ్రెస్ ఎమ్మెల్యే, ఎంపీ ఉన్నప్పటికీ అభివృద్ధి పనులు ముందుకు సాగడం లేదని విమర్శించారు. కనీసం ఒక్క అభివృద్ధి పనికి కూడా పునాది వేసిన దాఖలాలు లేవని, కేవలం ప్రారంభోత్సవాలకే పరిమితమయ్యారని అన్నారు.

లోకేశ్వరం, తాండూర్ మండలాలను కరువు మండలాలుగా ప్రకటించకపోవడం పట్ల ప్రజల్లో తీవ్ర ఆందోళన, అసంతృప్తి నెలకొందని పేర్కొన్నారు. బాసర ట్రిపుల్ ఐటీలో నీటి సరఫరా, విద్యార్థులకు నాణ్యమైన ఆహారం వంటి కనీస సదుపాయాలు కల్పించడంలో కాంగ్రెస్ ప్రభుత్వం విఫలమైందని, కేసీఆర్ హయాంలో సంస్థ అభివృద్ధికి ప్రత్యేక శ్రద్ధ తీసుకున్నారని విమర్శించారు. ముధోల్ నియోజకవర్గ అభివృద్ధికి కేసీఆర్ హయాంలోనే ప్రాధాన్యత లభించిందని, ప్రస్తుత కాంగ్రెస్, బీజేపీ నాయకులు ప్రజా సమస్యలను పట్టించుకోవడం లేదనిఅన్నారు. తాజా చేరికలతో నియోజకవర్గంలో బీఆర్ఎస్ మరింత బలోపేతమైందని ఆమె పేర్కొన్నారు.