ప్రపంచవ్యాప్తంగా ఆర్థిక, భౌగోళిక పరిస్థితులు సవాళ్లుగా ఉన్నప్పటికీ భారత ఆర్థిక వ్యవస్థ బలమైన వృద్ధిని కొనసాగిస్తోందని ప్రధాని నరేంద్ర మోదీ పేర్కొన్నారు. దేశంపై అంతర్జాతీయ విశ్వాసం పెరుగుతోందని, సెమీకండక్టర్ రంగంలో భారత్ సాధిస్తున్న పురోగతి దీనికి నిదర్శనమని తెలిపారు.
గురువారం న్యూఢిల్లీలోని యశోభూమిలో ‘సెమీకాన్ ఇండియా 2026’ను ప్రధాని ప్రారంభించారు. సెప్టెంబర్ 17 నుంచి 19 వరకు జరిగే ఈ కార్యక్రమంలో 40కి పైగా దేశాల ప్రతినిధులు, అంతర్జాతీయ కంపెనీలు, పెట్టుబడిదారులు, పరిశ్రమ నిపుణులు పాల్గొంటున్నారు.
సెమీకండక్టర్ తయారీతో పాటు డిజైన్, ప్యాకేజింగ్, పరిశోధన, ప్రతిభా అభివృద్ధి వంటి రంగాల్లో భారత్ సామర్థ్యాలను పెంచుకుంటోందని కేంద్ర ప్రభుత్వం తెలిపింది. సెమీకాన్ ఇండియా కార్యక్రమం ద్వారా పెట్టుబడులు, ఆవిష్కరణలు, అంతర్జాతీయ భాగస్వామ్యాలను మరింత ప్రోత్సహించడమే లక్ష్యంగా పెట్టుకున్నట్లు వెల్లడించింది.