పశ్చిమాసియాలో మరోసారి ఉద్రిక్త పరిస్థితులు నెలకొన్నాయి. హర్మూజ్ జలసంధిలో మూడు వాణిజ్య నౌకలపై దాడులు జరిగిన నేపథ్యంలో అమెరికా ఇరాన్పై భారీ వైమానిక దాడులు చేపట్టింది. యూఎస్ సెంట్రల్ కమాండ్ ప్రకారం, అంతర్జాతీయ జలమార్గంలో వాణిజ్య నౌకలను లక్ష్యంగా చేసుకోవడం కాల్పుల విరమణ ఒప్పందానికి విరుద్ధమని పేర్కొంటూ ఇరాన్ సైనిక స్థావరాలు, తీర ప్రాంత మౌలిక సదుపాయాలపై దాడులు నిర్వహించినట్లు వెల్లడించింది.
అమెరికా చర్యలకు ప్రతిగా ఇరాన్ తీవ్ర అభ్యంతరం వ్యక్తం చేసింది. ఇటీవల కుదిరిన తాత్కాలిక అవగాహన ఒప్పందాన్ని అమెరికానే ఉల్లంఘించిందని ఆరోపించింది. ఇదే సమయంలో ఇరాన్ చమురు విక్రయాలకు అనుమతించే ప్రత్యేక లైసెన్సును అమెరికా రద్దు చేయడంతో ఇరు దేశాల మధ్య ఉద్రిక్తతలు మరింత పెరిగాయి. ఈ నిర్ణయం హర్మూజ్ జలసంధిలో నౌకలపై జరిగిన దాడుల అనంతరం తీసుకున్న చర్యల్లో భాగమని అమెరికా వెల్లడించింది.
ఈ పరిణామాల ప్రభావం అంతర్జాతీయ ఇంధన మార్కెట్పైనా కనిపిస్తోంది. తాజా ఉద్రిక్తతలతో బ్రెంట్ క్రూడ్ చమురు ధరలు 3 శాతానికి పైగా పెరిగాయి. హర్మూజ్ జలసంధి గుండా ప్రపంచ చమురు రవాణాలో కీలక భాగం సాగుతుండటంతో, అక్కడ పరిస్థితులు మరింత దిగజారితే ప్రపంచవ్యాప్తంగా ఇంధన సరఫరా, చమురు ధరలపై తీవ్ర ప్రభావం పడే అవకాశముందని మార్కెట్ విశ్లేషకులు అంచనా వేస్తున్నారు.