నేషనల్ ఎలిజిబిలిటీ కమ్ ఎంట్రన్స్ టెస్ట్ సంక్షిప్తంగా నీట్. జాతీయ స్థాయిలో సెంట్రల్ యూనివర్సిటీలు, స్టేట్ యూనివర్సిటీలు, ఇతర అన్ని మెడికల్ ఇన్స్టిట్యూట్లలో ఎంబీబీఎస్, బీడీఎస్లతో పాటు ఆయుష్ కోర్సుల్లో చేరాలంటే.. నీట్ ఎంట్రన్స్ స్కోరే ప్రధానం. నీట్ స్కోర్ ఆధారంగానే మెడికల్ కోర్సుల్లో ప్రవేశం కల్పిస్తారు. అందుకే, ఇంటర్మీడియట్ బైపీసీ అర్హతగా నిర్వహించే ఈ పరీక్షకు ఏటా పోటీ పెరుగుతోంది. అందుకే దీన్ని భారత్లోని అన్ని పోటీ పరీక్షల్లో కెళ్లా అత్యధిక పోటీ గల పరీక్షగా పేర్కొంటారు. విద్యార్థులు ఈ పరీక్షలో విజయం సాధించేందుకు సంవత్సరం ముందు నుంచే సరైన ప్రణాళిక రూపొందించుకొని, పట్టుదలతో ప్రిపరేషన్ కొనసాగించాలి. అయితే, ఈ పరీక్షకు కేవలం 2 నెలల సమయం ఉన్నందున.. ఈ సమయంలో ప్రిపరేషన్ ఎలా కొనసాగించాలి? విజయం ఎలా సాధించాలి? అనే విషయాలపై ఓలుక్కేద్దాం.
నీట్ పరీక్షకు సిద్ధమవుతున్నప్పుడు, ముందుగా ప్రతి సబ్జెక్టులోని ప్రతి అధ్యాయంలో మీరు కష్టంగా భావించే అంశాలను గుర్తించండి. ఈ అధ్యాయాలను సవరించడానికి, పరిష్కరించడానికి ఎక్కువ సమయం కేటాయించండి. కఠినమైన సూత్రాలను నోట్ చేసుకొని వాటిని పదే పదే చదువుతూ ఉండండి.
ఒక్కొక్కరు ఒక్కో విధంగా చదువుతారు. ఏ ఇద్దరు విద్యార్థులు ఒకే రకమైన విధాన్నాన్ని అనుసరించరు. ఎవరి సొంత ఆలోచనలు, ప్రణాళిక ప్రకారం వారు ప్రిపరేషన్ కొనసాగిస్తారు. కొందరు గ్రాఫిక్స్ తో అధ్యయనం చేస్తే, మరికొందరు, ఆయా అధ్యాయాలను నిజ జీవిత పరిస్థితులతో అనుసంధానం చేసుకుంటూ చదువుతుంటారు. అయితే, మీ పరీక్ష విజయానికి ఏ మార్గం ఉత్తమంగా పనిచేస్తుందో అంచనా వేసుకోవాలి. అదే మార్గాన్ని ఫాలో అవ్వాలి.
నీట్ పరీక్ష ఎన్సీఈఆర్టీ సిలబస్పై ఆధారపడి ఉంటుంది. ఎన్సీఈఆర్టీ సిలబస్ బాగా లోతైన అధ్యయనంతో కూడిన కంటెంట్ను కలిగి ఉంటుంది. అందువల్ల, నీట్ ఎగ్జామ్లో పెద్ద సంఖ్యలో ప్రశ్నలు ఈ పుస్తకాల నుంచే వస్తాయి. ప్రిపరేషన్ ప్రారంభించే ముందు ఒక ప్రణాళిక ఏర్పర్చుకోండి. మీ పాఠ్యపుస్తకంలోని ఏ అధ్యాయం నుండి ఎన్ని ప్రశ్నలు వస్తాయి? ఎన్ని మార్కుల వెయిటేజీ ఉంటుంది? అన్ని ముఖ్యమైన అంశాలను కవర్ చేశామా? లేదా? అనే అంశాలపై అవగాహన పెంచుకోని ప్రిపరేషన్ ప్రారంభించండి.
NEET పరీక్ష కాస్త కఠినంగానే ఉంటుంది. అందువల్ల, క్రిందటి సంవత్సరంలో వచ్చిన ప్రశ్నలను సాధన చేయడం మీ ప్రిపరేషన్కు ఉపయోగపడుతుంది. దీని ద్వారా పరీక్షలో ఎటువంటి ప్రశ్నలు అడుగుతారనే విషయంపై అవగాహన ఏర్పడుతుంది. అందువల్ల, వీలైనన్ని ఎక్కువ మాక్ పరీక్షలు రాసే ప్రయత్నం చేయండి. ఇది పరీక్ష సమయంలోనూ టైం మేనేజ్మెంట్కు ఉపయోగపడుతుంది.
మాక్ పరీక్షలను సాధన చేస్తే సరిపోదు.. ఎక్కడ తప్పు చేస్తున్నారో గుర్తించి, వాటిని రిఫరెన్స్ బుక్స్ లేదా ప్రొఫెసర్ల ద్వారా నివృత్తి చేసుకోవాలి. తద్వారా మళ్లీ అవే తప్పులు జరగకుండా ఉండేందుకు మీకు ఉపయోగపడుతుంది.
పరీక్షకు కొద్ది రోజుల ముందు టైం టేబుల్ ప్రకారం ప్రిపరేషన్ కొనసాగించాలి. ఇది మీ జీవితంలో అత్యంత కీలకమైన సమయమని భావించండి. ప్రతి క్షణాన్ని సద్వినియోగం చేసుకోండి. స్నేహితులతో. బంధువులతో కాలక్షేపం చేయడం, సినిమాలు, సోషల్ మీడియా, టీవీ షోలు చూడడాన్ని కొద్ది కాలం పాటు మానేయండి.