తెలుగు సినీ చరిత్రలో విశ్వవిఖ్యాత నటసార్వభౌమ నందమూరి తారకరామారావు సృష్టించిన అద్భుత దృశ్యకావ్యం ‘దాన వీర శూర కర్ణ’. 1977లో విడుదలైన ఈ పౌరాణిక చిత్రం అప్పట్లో బాక్సాఫీస్ వద్ద సరికొత్త రికార్డులు నెలకొల్పింది. కేవలం రూ.10 లక్షల బడ్జెట్తో తెరకెక్కిన ఈ సినిమా.. ఒక రూపాయి టికెట్ ధర ఉన్న రోజుల్లోనే ఏకంగా రూ.2 కోట్ల వసూళ్లు సాధించి తెలుగు చిత్ర పరిశ్రమలో సంచలనం సృష్టించింది.
ఎన్టీఆర్ స్వయంగా దర్శకత్వం వహిస్తూ.. కర్ణుడు, దుర్యోధనుడు, శ్రీకృష్ణుడు వంటి కీలక పాత్రల్లో నటించడం ఈ సినిమాకు ప్రత్యేక ఆకర్షణగా నిలిచింది. భారీ సెట్లు, అద్భుతమైన సంభాషణలు, నటీనటుల అద్భుత ప్రదర్శనతో పౌరాణిక చిత్రాల్లోనే ప్రత్యేక స్థానాన్ని సంపాదించుకుంది. అంతేకాదు, కేవలం 43 రోజుల్లోనే సినిమా చిత్రీకరణ పూర్తి చేయడం అప్పట్లో మరో రికార్డుగా నిలిచింది.
విడుదలైన సమయంలో ప్రేక్షకుల నుంచి అపూర్వమైన ఆదరణ అందుకున్న ‘దాన వీర శూర కర్ణ’.. బాక్సాఫీస్ వద్ద కలెక్షన్ల సునామీ సృష్టించింది. రూ.2 కోట్లకు పైగా వసూళ్లు సాధించిన తొలి తెలుగు చిత్రంగా రికార్డు సృష్టించిందని సినీ వర్గాలు పేర్కొంటాయి. నేటికీ ఈ సినిమా తెలుగు సినిమా చరిత్రలో ఒక మైలురాయిగా, ఎన్టీఆర్ ప్రతిభకు నిదర్శనంగా నిలిచిపోయింది.