వాలీబాల్ క్రీడకు తెలుగు రాష్ట్రాల్లో కొత్త ఊపు తీసుకురావాలనే లక్ష్యంతో హైదరాబాద్ బ్లాక్ హాక్స్ సంస్థ కీలక చర్యలు చేపట్టింది. ఆంధ్రప్రదేశ్, తెలంగాణలోని ప్రతిభావంతులైన క్రీడాకారులను గుర్తించి అంతర్జాతీయ స్థాయికి తీర్చిదిద్దేందుకు దీర్ఘకాలిక కార్యాచరణ ప్రణాళికను అమలు చేస్తున్నట్లు సంస్థ వెల్లడించింది.
ఈ ప్రణాళికలో భాగంగా విజయవాడలో నిర్వహించిన ప్రైమ్ వాలీబాల్ లీగ్ (PVL) ఓపెన్ ట్రయల్స్, అండర్-21 ఎంపిక పరీక్షలు క్రీడా వర్గాల్లో విశేష ఆసక్తిని రేకెత్తించాయి. రాష్ట్రంలోని వివిధ ప్రాంతాల నుంచి పెద్ద సంఖ్యలో యువ క్రీడాకారులు హాజరై తమ ప్రతిభను ప్రదర్శించారు.
ఈ ట్రయల్స్ ద్వారా ప్రతిభావంతులైన ఆటగాళ్లను ఎంపిక చేసి వారికి నాణ్యమైన శిక్షణ, పోటీ అవకాశాలు కల్పించడం ద్వారా అంతర్జాతీయ స్థాయికి తీసుకెళ్లడమే లక్ష్యమని నిర్వాహకులు తెలిపారు. తెలుగు రాష్ట్రాల్లో వాలీబాల్ అభివృద్ధికి ఈ కార్యక్రమం కీలక మైలురాయిగా నిలుస్తుందని క్రీడా నిపుణులు అభిప్రాయపడుతున్నారు.