గాజాలో శాంతి పునరుద్ధరణ కోసం అమెరికా అధ్యక్షుడు డొనాల్డ్ ట్రంప్ నేతృత్వంలోని ‘బోర్డ్ ఆఫ్ పీస్’ రూపొందించిన ఒప్పందంపై ఇజ్రాయెల్ ప్రధాని బెంజమిన్ నెతన్యాహు అసంతృప్తి వ్యక్తం చేసినట్లు సమాచారం. అమెరికా-హమాస్ మధ్య కుదిరినట్లు చెబుతున్న ఈ శాంతి ఒప్పందంలోని కొన్ని అంశాలపై తనకు, ట్రంప్కు మధ్య స్పష్టమైన అభిప్రాయ భేదాలు ఉన్నాయని నెతన్యాహు బహిరంగంగా వెల్లడించినట్లు కథనాలు పేర్కొంటున్నాయి.
ముఖ్యంగా హమాస్ పూర్తిగా ఆయుధాలు విడిచిపెట్టే వరకు గాజాలో శాశ్వత శాంతి సాధ్యం కాదని నెతన్యాహు స్పష్టం చేసినట్లు తెలుస్తోంది. హమాస్కు సంబంధించిన భద్రతా అంశాలపై ఎలాంటి రాజీకి సిద్ధంగా లేమనే సంకేతాలను ఆయన ఇచ్చినట్లు సమాచారం. దీంతో శాంతి ఒప్పందం అమలు, గాజా భవిష్యత్ పాలన వంటి అంశాలపై ఇజ్రాయెల్, అమెరికా మధ్య భిన్నాభిప్రాయాలు మరింత స్పష్టమవుతున్నాయి.
ఈ పరిణామం అంతర్జాతీయ దౌత్య వర్గాల్లో ఆసక్తిని రేకెత్తిస్తోంది. గాజాలో యుద్ధానికి ముగింపు పలికి శాంతి ప్రక్రియను ముందుకు తీసుకెళ్లేందుకు అమెరికా ప్రయత్నిస్తున్న వేళ.. ఇజ్రాయెల్ భద్రతాపరమైన డిమాండ్లు ఎంతవరకు ఆమోదించబడతాయన్నది కీలకంగా మారింది. ట్రంప్-నెతన్యాహు మధ్య భేదాభిప్రాయాలు మరింత పెరుగుతాయా లేదా చర్చల ద్వారా పరిష్కారం లభిస్తుందా అనేది ఇప్పుడు ఉత్కంఠగా మారింది.