జనసేన పార్టీని క్షేత్రస్థాయిలో మరింత బలోపేతం చేసే దిశగా ఆ పార్టీ అధినేత, ఉప ముఖ్యమంత్రి పవన్ కల్యాణ్ కీలక సమావేశం నిర్వహిస్తున్నారు. రాష్ట్రంలోని మొత్తం 25 పార్లమెంట్ నియోజకవర్గాల కమిటీలతో కాసేపట్లో ఆయన భేటీ కానున్నారు. ఎన్నికల తర్వాత పార్టీ నిర్మాణం, భవిష్యత్ కార్యాచరణ, ప్రభుత్వంలో జనసేన పాత్ర తదితర కీలక అంశాలపై ఈ సమావేశంలో సుదీర్ఘంగా చర్చించనున్నారు.
రాబోయే రోజుల్లో స్థానిక సంస్థల ఎన్నికలతో పాటు పార్టీని పటిష్టం చేసేందుకు తీసుకోవాల్సిన చర్యలపై నేతలకు పవన్ కల్యాణ్ దిశా నిర్దేశం చేయనున్నారు. పార్లమెంట్ నియోజకవర్గాల వారీగా పార్టీ పరిస్థితి, సభ్యత్వ నమోదు, కమిటీల పనితీరుపై కూడా ఆయన ఆరా తీయనున్నారు. క్షేత్రస్థాయిలో ఎదురవుతున్న సమస్యలను ప్రభుత్వ దృష్టికి తీసుకెళ్లడంలో కమిటీలు ఎలా వ్యవహరించాలో స్పష్టం చేయనున్నారు.
ఈ కీలక సమావేశానికి పార్టీ ముఖ్య నేతలు, రాజకీయ వ్యవహారాల కమిటీ సభ్యులు కూడా హాజరుకానున్నారు. నేతల నుంచి వచ్చే సలహాలు, సూచనలను పరిగణలోకి తీసుకొని భవిష్యత్ రాజకీయ వ్యూహాలకు పవన్ తుదిరూపు ఇవ్వనున్నారు. ఈ భేటీ జనసేన పార్టీ శ్రేణుల్లో నూతన ఉత్సాహాన్ని నింపుతుందని రాజకీయ వర్గాలు భావిస్తున్నాయి.