హైదరాబాద్ నగరంలో పాఠశాల బస్సు డ్రైవర్ల నిర్లక్ష్యం తీవ్ర ఆందోళన కలిగిస్తోంది. విద్యార్థులను పాఠశాలలకు తరలిస్తున్న సమయంలో డ్రైవర్లు ఏకంగా 55,995 సార్లు మొబైల్ ఫోన్లు వాడుతూ పట్టుబడినట్లు హైదరాబాద్ ట్రాఫిక్ పోలీసులు వెల్లడించారు. రవీంద్రభారతిలో ‘పాఠశాల విద్యార్థుల భద్రత’ అనే అంశంపై నిర్వహించిన ఉన్నత స్థాయి సమావేశంలో ఈ దిగ్భ్రాంతికరమైన విషయాలు వెలుగుచూశాయి.
ఈ సమావేశంలో ట్రాఫిక్ విభాగం జాయింట్ కమిషనర్ జోయెల్ డేవిస్ గణాంకాలను వివరిస్తూ, 2026 జనవరి 1 నుంచి మే 31 వరకు నగరంలో 1,604 రోడ్డు ప్రమాదాలు చోటుచేసుకోగా, వాటిలో 141 ప్రాణాంతకమైనవని తెలిపారు. ఈ ప్రమాదాల్లో ఏడుగురు చిన్నారులు మరణించారని, మైనర్ డ్రైవింగ్, హెల్మెట్ ధరించకపోవడమే ఇందుకు ప్రధాన కారణాలని వివరించారు. డ్రైవర్ల ఆరోగ్య సమస్యలు సైతం ఆందోళనకరంగా ఉన్నాయని, 1,014 మంది పాఠశాల బస్సు డ్రైవర్లకు నిర్వహించిన ఆరోగ్య పరీక్షల్లో, 316 మందికి కంటిచూపు సమస్యలు ఉన్నట్లు తేలిందని అధికారులు పేర్కొన్నారు.
నగర పోలీస్ కమిషనర్ వీసీ సజ్జనార్ మాట్లాడుతూ, కేవలం అవగాహన కార్యక్రమాలకే పరిమితం కాకుండా, భద్రతా నిబంధనలను కఠినంగా అమలు చేయాలని పాఠశాల యాజమాన్యాలను, తల్లిదండ్రులను కోరారు. ఈ ఏడాది తొలి ఐదు నెలల్లోనే 2,539 మైనర్ డ్రైవింగ్ కేసులు నమోదైనట్లు ఆయన వెల్లడించారు. భద్రతా ప్రమాణాలను మెరుగుపరచడానికి పూర్తిస్థాయిలో సహకరిస్తామని జీహెచ్ఎంసీ కమిషనర్ ఆర్వీ కర్ణన్ హామీ ఇచ్చారు. పాఠశాల బస్సులే కాకుండా, ప్రైవేటు వాహనాలు, ఆటోరిక్షాలలో ప్రయాణించే విద్యార్థుల రవాణా వివరాలను కూడా పాఠశాలలు తప్పనిసరిగా నమోదు చేయాలని జోయెల్ డేవిస్ సూచించారు.