తెలంగాణలో గత కొన్ని రోజులుగా తీవ్ర సంచలనం సృష్టించిన పోక్సో (POCSO) కేసులో నిందితుడిగా ఉన్న కేంద్ర సహాయ మంత్రి బండి సంజయ్ కుమారుడు బండి భగీరథ్కు న్యాయస్థానంలో పెద్ద ఊరట లభించింది. గత నెల రోజులుగా చర్లపల్లి జైల్లో రిమాండ్ ఖైదీగా జైలు జీవితం గడుపుతున్న అతనికి తాజాగా మల్కాజ్గిరి కోర్టు షరతులతో కూడిన బెయిల్ మంజూరు చేసింది.
ఒక మైనర్ బాలిక తల్లి ఇచ్చిన ఫిర్యాదుతో బండి భగీరథ్పై కఠినమైన పోక్సో చట్టం కింద పోలీసులు కేసు నమోదు చేసిన సంగతి తెలిసిందే. కేంద్ర మంత్రి కొడుకు కావడం, పైగా అత్యంత సున్నితమైన కేసు కావడంతో రెండు తెలుగు రాష్ట్రాల రాజకీయ మరియు సామాజిక వర్గాల్లో ఈ అంశం పెద్ద ఎత్తున చర్చకు దారితీసింది. కేసు నమోదైన తర్వాత కొన్ని రోజులు అజ్ఞాతంలోకి వెళ్లిన భగీరథ్.. మే 17న పోలీసుల ముందుకు వచ్చి సరెండర్ అయ్యాడు. ఆ తర్వాత మేడ్చల్ కోర్టు 14 రోజుల జ్యుడీషియల్ రిమాండ్ విధించడంతో పోలీసులు అతనిని జైలుకు తరలించారు.
గతంలో దాఖలు చేసిన బెయిల్ పిటిషన్లు తిరస్కరణకు గురికావడంతో భగీరథ్ నెల రోజులకు పైగా జైల్లోనే గడపాల్సి వచ్చింది. తాజాగా అతని ఇంజినీరింగ్ పరీక్షలను పరిగణనలోకి తీసుకున్న మల్కాజ్గిరి న్యాయస్థానం, ఇరుపక్షాల వాదనలు విన్న అనంతరం కొన్ని కీలక షరతులతో కూడిన బెయిల్ ఇస్తూ తుది ఉత్తర్వులు జారీ చేసింది. కోర్టు ఆదేశాల ప్రతి జైలు అధికారులకు అందిన వెంటనే భగీరథ్ చర్లపల్లి జైలు నుండి విడుదలయ్యే అవకాశం ఉండటంతో, అతని మద్దతుదారులు మరియు కుటుంబ సభ్యులు హర్షం వ్యక్తం చేస్తున్నారు.