బీఆర్ఎస్ నేత కల్వకుంట్ల కవిత జనసేన అధినేత పవన్ కల్యాణ్పై సంచలన ఆరోపణలు చేశారు. తాజాగా సోషల్ మీడియాలో వైరల్ అవుతున్న ఒక వీడియోలో ఆమె పవన్ను లక్ష్యంగా చేసుకుని తీవ్ర స్థాయిలో విరుచుకుపడ్డారు. పవన్ కల్యాణ్ ఉపయోగిస్తున్న ఖరీదైన కార్లు, ఆయన కొనుగోలు చేసిన ఆస్తుల వెనుక తమ డబ్బులు ఉన్నాయంటూ ఆమె చేసిన వ్యాఖ్యలు ఇప్పుడు రెండు తెలుగు రాష్ట్రాల రాజకీయాల్లో తీవ్ర దుమారం రేపుతున్నాయి.
పవన్ కల్యాణ్ వేదికలెక్కి నీతులు చెబుతూ రాజకీయాలు చేస్తున్నారని, కానీ వాస్తవానికి ఆయన విలాసవంతమైన జీవితం వెనుక వేరే కోణం ఉందని కవిత విమర్శించారు. ఆయన తిరుగుతున్న కార్లు, వెనకేసిన ఆస్తులు, కొనుగోలు చేసిన భూముల్లో తమ సొమ్ము కూడా దాగి ఉందని ఆమె సంచలన వ్యాఖ్యలు చేశారు. రాజకీయాలను అడ్డం పెట్టుకుని ఆయన ఈ ఆస్తులను కూడబెట్టారనే ఉద్దేశంతో ఆమె ఈ విమర్శనాస్త్రాలు సంధించినట్లు రాజకీయ విశ్లేషకులు భావిస్తున్నారు.
కవిత మాట్లాడిన ఈ వీడియో నెట్టింట వైరల్ కావడంతో జనసేన శ్రేణులు, పవన్ అభిమానులు తీవ్ర ఆగ్రహం వ్యక్తం చేస్తున్నారు. కవిత చేసిన ఈ ఆరోపణలను జనసేన నాయకులు తీవ్రంగా ఖండిస్తూ, కనీస ఆధారాలు లేకుండా తమ నాయకుడిపై బురదజల్లే ప్రయత్నం చేస్తున్నారని మండిపడుతున్నారు. ఈ తాజా పరిణామంతో అటు బీఆర్ఎస్, ఇటు జనసేన నాయకుల మధ్య మాటల యుద్ధం మరింత ముదిరి, సరికొత్త రాజకీయ రచ్చకు దారితీసింది.