ప్రస్తుత కూటమి ప్రభుత్వంపై అంబటి మౌనిక తీవ్రస్థాయిలో విరుచుకుపడ్డారు. ఈ ప్రభుత్వం ఎక్కువ కాలం నిలవదని, త్వరలోనే కుప్పకూలుతుందని ఆమె జోస్యం చెప్పారు. తమ కుటుంబంపై ప్రభుత్వం కక్ష గట్టిందని, రాజకీయ కక్ష సాధింపులో భాగంగానే తన తండ్రిపై వరుస కేసులు పెట్టి జైలుకు పంపారని ఆమె ఆరోపించారు. ముఖ్యంగా గుంటూరులో తమ నివాసంపై జరిగిన దాడిని ప్రస్తావిస్తూ, అన్యాయంగా కేసులు పెట్టి ఇబ్బందులకు గురిచేస్తున్నారని మౌనిక ఆవేదన వ్యక్తం చేశారు.
తన తండ్రి అంబటి రాంబాబు 18 రోజుల పాటు రాజమండ్రి సెంట్రల్ జైలులో ఉండి, బుధవారం సాయంత్రం బెయిల్పై విడుదలయ్యారు. ఈ సందర్భంగా ఆమె మాట్లాడుతూ, తన తండ్రి ఏ తప్పూ చేయలేదని, కేవలం ప్రతిపక్ష గొంతుకను నొక్కేందుకే ఈ అరెస్టులు చేస్తున్నారని మండిపడ్డారు. జైలు నుండి విడుదలైన తన తండ్రికి పార్టీ శ్రేణులు ఘనంగా స్వాగతం పలికారని, అన్యాయానికి వ్యతిరేకంగా తాము పోరాటం కొనసాగిస్తామని ఆమె స్పష్టం చేశారు.
వైఎస్ జగన్ మోహన్ రెడ్డి నాయకత్వంపై మౌనిక ప్రశంసలు కురిపించారు. జగన్ గారు ప్రతికూల పరిస్థితులను ఎదుర్కొని ఎదిగిన గొప్ప నాయకుడని, ఆయనను స్ఫూర్తిగా తీసుకుని ప్రతి కార్యకర్త పనిచేస్తున్నారని ఆమె అన్నారు. కూటమి నేతలు ఎంతగా వేధించినా తమ నైతిక స్థైర్యాన్ని దెబ్బతీయలేరని, న్యాయం తమ వైపే ఉందని ఆమె ధీమా వ్యక్తం చేశారు. ప్రభుత్వ తీరుపై ఆమె చేసిన “శాపనార్థాలు” సోషల్ మీడియాలో వైరల్ అవుతున్నాయి.