ఏపీ డిప్యూటీ సీఎం పవన్ కల్యాణ్ రేపటి (జనవరి 28) నుంచి చేపట్టాల్సిన పిఠాపురం నియోజకవర్గ పర్యటన అనివార్య కారణాలతో వాయిదా పడింది. నియోజకవర్గంలో పార్టీని క్షేత్రస్థాయి నుంచి బలోపేతం చేసే దిశగా జనసేన పార్టీ టౌన్, వార్డు మరియు బూత్ స్థాయి కమిటీల ఎన్నికలను నిర్వహిస్తోంది. ఈ ఎన్నికల ప్రక్రియ జనవరి 28 నుంచి 30 వరకు మూడు రోజుల పాటు జరగనున్న నేపథ్యంలో, పవన్ కల్యాణ్ తన పర్యటనను వాయిదా వేసుకున్నట్లు జనసేన వర్గాలు వెల్లడించాయి.
జనసేన పార్టీ ఈసారి సరికొత్త ప్రజాస్వామ్య పద్ధతిలో కమిటీ సభ్యుల ఎంపికను చేపట్టింది. పార్టీ సభ్యత్వం కలిగిన ఓటర్లు ప్రత్యక్షంగా ఓటింగ్ ద్వారా తమ ప్రతినిధులను ఎన్నుకునే విధానాన్ని తొలిసారిగా అమలు చేస్తోంది. రేపు (జనవరి 28) అభ్యర్థుల నామినేషన్ల దాఖలుకు అవకాశం కల్పించారు. నియోజకవర్గంలోని పార్టీ శ్రేణులన్నీ ఈ ఎన్నికల ప్రక్రియలో నిమగ్నమై ఉండటంతో పవన్ పర్యటనను వాయిదా వేయడమే సరైన నిర్ణయమని పార్టీ నేతలు భావించారు.
పవన్ కల్యాణ్ పిఠాపురం పర్యటనకు సంబంధించిన కొత్త తేదీలను పార్టీ త్వరలోనే అధికారికంగా ప్రకటించనుంది. ఈ పర్యటనలో నియోజకవర్గ అభివృద్ధి పనుల సమీక్షతో పాటు, పార్టీ కార్యకర్తలతో పవన్ ముఖాముఖి నిర్వహించాల్సి ఉంది. కమిటీల ఎన్నికలు పూర్తయిన వెంటనే కొత్త కార్యవర్గంతో కలిసి పవన్ కల్యాణ్ పిఠాపురంలో పర్యటించే అవకాశం ఉంది. అప్పటివరకు కార్యకర్తలు క్రమశిక్షణతో ఎన్నికల ప్రక్రియను పూర్తి చేయాలని పార్టీ పిలుపునిచ్చింది.