తమిళనాడు అసెంబ్లీ ఎన్నికలు సమీపిస్తున్న తరుణంలో కాంగ్రెస్ పార్టీ ఒక కీలకమైన రాజకీయ చౌరస్తాలో నిలబడింది. గత కొన్ని దశాబ్దాలుగా అధికార డీఎంకే (DMK) తో నమ్మకమైన మిత్రుడిగా కొనసాగుతున్న హస్తం పార్టీ, ఇప్పుడు తన భవిష్యత్ వ్యూహంపై తీవ్ర మథనం చెందుతోంది. అటు పాత మిత్రుడు సీఎం స్టాలిన్ను వదులుకోలేక, ఇటు కొత్తగా రాజకీయాల్లోకి వచ్చి ప్రభంజనం సృష్టిస్తున్న నటుడు విజయ్ నేతృత్వంలోని టీవీకే (TVK) పార్టీ ఆహ్వానాన్ని కాదనలేక కాంగ్రెస్ సందిగ్ధంలో పడింది. రేపు (ఆదివారం) జరగనున్న తమిళనాడు కాంగ్రెస్ కమిటీ కీలక కార్యవర్గ సమావేశంలో ఈ పొత్తుల అంశంపై ఒక స్పష్టత వచ్చే అవకాశం ఉంది.
ఈ వివాదానికి ప్రధాన కారణం ‘పవర్ షేరింగ్’ (అధికారంలో వాటా). కాంగ్రెస్ ఎంపీ మాణిక్కం ఠాగూర్ ఇటీవల చేసిన వ్యాఖ్యలు కూటమిలో చిచ్చు పెట్టాయి. “కాంగ్రెస్ కేవలం ఒక ఎన్జీవో కాదు, ప్రభుత్వంలో మాకు కూడా వాటా ఉండాలి” అని ఆయన డిమాండ్ చేశారు. అయితే, తమిళనాడులో సంకీర్ణ ప్రభుత్వాలకు తావులేదని డీఎంకే ఈ ప్రతిపాదనను తెగేసి చెప్పింది. దాదాపు 58 ఏళ్లుగా రాష్ట్రంలో అధికారానికి దూరంగా ఉన్న కాంగ్రెస్ శ్రేణులు, ఈసారి ఎలాగైనా ప్రభుత్వంలో భాగస్వాములు కావాలని పట్టుబడుతున్నారు. ఇదే సమయంలో విజయ్ తన టీవీకే పార్టీకి కాంగ్రెస్ ఒక ‘సహజ మిత్రుడు’ అని ప్రకటించడం హస్తం పార్టీకి కొత్త ఆప్షన్ను ఇచ్చింది.
మరోవైపు తమిళనాడులో కాంగ్రెస్ పార్టీ ఓట్ల శాతం నానాటికీ క్షీణించడం ఆ పార్టీని ఆందోళనకు గురి చేస్తోంది. 2011లో 9.3 శాతంగా ఉన్న ఓటు షేర్, 2021 నాటికి 4.27 శాతానికి పడిపోయింది. ఉనికిని కాపాడుకోవాలంటే ఈసారి కనీసం 40 కంటే ఎక్కువ అసెంబ్లీ స్థానాల్లో పోటీ చేయాలని కాంగ్రెస్ భావిస్తోంది. డీఎంకే అంత సీట్లు కేటాయించకపోతే, విజయ్ పార్టీతో జతకట్టడం మేలనే వాదన ఒక వర్గం నుంచి వినిపిస్తోంది. అయితే, దశాబ్దాల అనుబంధం ఉన్న డీఎంకేను వదిలి, ఇంకా ఎన్నికల పరీక్ష ఎదుర్కోని కొత్త పార్టీతో వెళ్లడం సాహసమే అవుతుందని సీనియర్లు భావిస్తున్నారు.