ఆంధ్రప్రదేశ్లో అత్యాధునిక సాంకేతికతను సామాన్యుడికి చేరువ చేస్తూ, ఈ ఏడాది నుంచే రాష్ట్రంలో డ్రోన్ టాక్సీలు, డ్రోన్ అంబులెన్సులను అందుబాటులోకి తీసుకురానున్నట్లు ముఖ్యమంత్రి చంద్రబాబు నాయుడు ప్రకటించారు. ట్రాఫిక్ ఇబ్బందులు లేకుండా అత్యవసర వైద్య సేవలు అందించడానికి అంబులెన్స్ డ్రోన్లు, ప్రయాణ సమయాన్ని తగ్గించడానికి డ్రోన్ టాక్సీలు కీలక పాత్ర పోషిస్తాయని ఆయన పేర్కొన్నారు. విశాఖపట్నం కేంద్రంగా ఈ సాంకేతికత అభివృద్ధి చెందుతోందని, ఇప్పటికే విశాఖకు వేల కోట్ల పెట్టుబడులు వస్తున్నాయని ఆయన ఈ సందర్భంగా గుర్తు చేశారు.
రాష్ట్ర అభివృద్ధిలో ప్రవాసాంధ్రులను (NRIs) భాగస్వాములను చేస్తూ, వారిని పారిశ్రామికవేత్తలుగా మార్చేందుకు రూ. 50 కోట్ల కార్పస్ ఫండ్ను కేటాయిస్తున్నట్లు ముఖ్యమంత్రి వెల్లడించారు. ‘వన్ ఫ్యామిలీ-వన్ ఎంట్రప్రెన్యూర్’ (ఒక కుటుంబం-ఒక పారిశ్రామికవేత్త) నినాదంతో ముందుకు వెళ్తున్నామని, ప్రతి ఇంట్లో ఒక పారిశ్రామికవేత్త తయారైనప్పుడే రాష్ట్ర ఆర్థిక వ్యవస్థ బలోపేతం అవుతుందని ఆయన అభిప్రాయపడ్డారు. ఎన్నారైలు రాష్ట్రంలో పెట్టుబడులు పెట్టడానికి ముందుకు రావాలని, వారికి ప్రభుత్వం నుంచి పూర్తి సహకారం ఉంటుందని హామీ ఇచ్చారు.
విద్యార్థుల కోసం కూడా సీఎం కీలక హామీలు ఇచ్చారు. ప్రపంచంలోని ఉత్తమ విశ్వవిద్యాలయాల్లో చదువుకోవాలనుకునే ఆంధ్రప్రదేశ్ విద్యార్థులకు కేవలం 4% వడ్డీతో విద్యా రుణాలు అందిస్తామని ప్రకటించారు. విదేశాల్లో ఏపీ విమానాలు నడిపేలా చర్యలు తీసుకుంటామని, జ్యూరిచ్ వంటి నగరాల నుంచి నేరుగా విమాన సర్వీసులు ఉండేలా ప్రయత్నిస్తామని తెలిపారు. అగాథంలో ఉన్న ఏపీని మళ్ళీ అగ్రస్థానానికి తీసుకురావడమే తమ లక్ష్యమని, ఇందులో ప్రతి ఒక్క తెలుగువాడు భాగస్వామి కావాలని ఆయన పిలుపునిచ్చారు.