అలాంటివి ఎక్కడైనా జరగవచ్చు..
– ఇలాంటి సంఘటన ఏ మతానికి సంబంధించిన ఆధ్యాత్మిక కార్యక్రమంలోనైనా జరగవచ్చు. మన దేశంలో అనేకమంది ఆధ్యాత్మిక వేత్తలున్నారు. దేశంలోనే కాకుండా విదేశాల్లో కూడా వేలు, లక్షల సంఖ్యలో భక్తులున్న అనేకమంది పెద్దలు అన్ని మతాల్లోనూ ఉన్నారు. రవిశంకర్‌ ఆర్ట్‌ ఆఫ్‌ లివింగ్‌ గానీ, జగ్గీవాసుదేవ్‌ ఈషా పౌండేషన్‌లో గానీ, మాతా అమృతానందమయి సభల్లో గానీ లేదా పాల్‌ దినకరన్‌ ఆధ్యాత్మిక కార్యక్రమంలో గానీ, జాన్‌ వెస్లీ ఆధ్యాత్మిక కార్యక్రమంలో గానీ ఎవరైనా పాల్గొనవచ్చు. ఎవరికైనా ఈ పరిస్థ్దితి రావచ్చు. ఇది ఎక్కడైనా జరగవచ్చు. ఎక్కడ జరిగినా అదొక ఉదేశపూర్వకంగా జరిగిన సంఘటనగా కాకుండా దురదృష్టకర సంఘటనగానే చూడాలే తప్ప, ఓ మతానికో, కులానికో ఆపాదించి వారేదో తప్పుచేసినట్టుగా, నేరం చేసినట్లుగా, కావాలని చేసినట్లుగా చూపడం, చూపే ప్రయత్నం ఎవరూ చేయకూడదు. అలాంటి ప్రయత్నాలు అత్యంత దురదృష్టకరం. అలాంటి ప్రయత్నాలు మనమంతా ఒక్కటిగా ఉన్నామని చెప్పేందుకు దోహదం చేయవు.
మన ఐక్యతను చాటుదాం…
– కరోనా కాటుకు మందు లేదు. కరోనా కాటుకు మతాల్లేవు. కరోనా కాటుకు ధనిక, పేద అనే తేడా లేదు. కరోనా కాటుకు దేశాలు అనే తేడా కూడా లేదు. ఈ యుద్ధంలో మన ప్రత్యర్ధి కంటికి కనిపించని కరోనా వైరస్. దీనికి వ్యతిరేకంగా మనుషులుగా అంతా పోరాటం చేస్తున్నాం. గెలిచి తీరాల్సిన సమయం ఇది. అందరం ఐక్యంగా ఉన్నామని దేశానికి, ప్రపంచానికి చాటిచెబుతాం. ప్రధాని నరేంద్ర మోదీ పిలుపుమేరకు ఈ నెల 5వ తేదీన ఆదివారం రాత్రి 9 గంటలకు తొమ్మిది నిమిషాల పాటు మనమంతా వెలిగించే దీపాలు కులాలు, మతాలు, ప్రాంతాలు, రాష్ట్రాలు అనే సరిహద్దులు లేకుండా అందరం ఒక్కటే అనే సందేశాన్ని ఇవ్వాలి. చీకటిని నింపుతున్న కరోనా మీద దివ్వెలు, దీపాలు, కొవ్వొత్తులు, టార్చ్‌లు, సెల్‌ఫోన్‌ లైట్ల కాంతులు వెలుగుకు నిజమైన అర్ధం తేవాలి. ఈ సందేశాన్ని ఎలాంటి పరిస్ధితులో ఇస్తున్నామో ఇవాళ ఏ మీడియాలో చూసినా అందరికీ బోధపడుతుంది.