డొనాల్డ్ ట్రంప్ యంత్రాంగం దేశవ్యాప్తంగా అక్రమ వలసదారుల ఏరివేత ప్రక్రియను వేగవంతం చేసింది. ఇందులో భాగంగా కాలిఫోర్నియాలోని ఇమ్మిగ్రేషన్ చెక్ పోస్టుల వద్ద నిర్వహించిన తనిఖీల్లో మొత్తం 49 మంది అక్రమ వలసదారులను అమెరికా కస్టమ్స్ అండ్ బోర్డర్ ప్రొటెక్షన్ (CBP) అధికారులు అదుపులోకి తీసుకున్నారు. వీరిలో అత్యధికంగా 30 మంది భారతీయులు ఉండటం గమనార్హం. పట్టుబడిన వారిలో కొందరు కమర్షియల్ డ్రైవింగ్ లైసెన్స్లతో సెమీ ట్రక్కులు నడుపుతుండగా, మరికొందరు ఎటువంటి అనుమతులు లేకుండా నివసిస్తున్నట్లు అధికారులు గుర్తించారు.
ఆపరేషన్ ‘హైవే సెంటినెల్’ (Highway Sentinel):
ఇటీవల అమెరికాలో విదేశీ ట్రక్కు డ్రైవర్ల నిర్లక్ష్యం వల్ల జరిగిన రోడ్డు ప్రమాదాల్లో అనేకమంది ప్రాణాలు కోల్పోయారు. ఈ నేపథ్యంలో ట్రంప్ ప్రభుత్వం విదేశీ డ్రైవర్లకు వర్క్ వీసాలు, లైసెన్స్ల జారీపై ఆంక్షలు విధించింది. దీని కొనసాగింపుగా నవంబర్ 23 నుంచి డిసెంబర్ 12 వరకు కమర్షియల్ ట్రక్కింగ్ కంపెనీలే లక్ష్యంగా ‘ఆపరేషన్ హైవే సెంటినెల్’ నిర్వహించారు. పట్టుబడిన భారతీయులతో పాటు చైనా, మెక్సికో, రష్యా, టర్కీ వంటి దేశాలకు చెందిన వారు కూడా ఉన్నారు. వీరి వద్ద ఉన్న లైసెన్స్లు కాలిఫోర్నియా, ఫ్లోరిడా, న్యూయార్క్ వంటి 11 వేర్వేరు రాష్ట్రాల నుంచి జారీ అయినట్లు తేలింది.
అమెరికా భద్రత మరియు హైవేల రక్షణ కోసమే ఈ చర్యలు తీసుకుంటున్నామని అధికారులు స్పష్టం చేశారు. అక్రమంగా ప్రవేశించిన వారు ట్రక్కులు నడుపుతూ ప్రమాదాలకు కారణమవుతున్నారని, ఇది దేశ భద్రతకు ముప్పు అని పేర్కొన్నారు. కాలిఫోర్నియాలో రాజిందర్ కుమార్ అనే భారతీయ డ్రైవర్ వల్ల జరిగిన ప్రమాదంలో ఇద్దరు యువకులు మృతి చెందిన ఘటనను అధికారులు ఉదహరించారు. అదుపులోకి తీసుకున్న వారందరినీ ప్రస్తుతం డిటెన్షన్ సెంటర్లకు తరలించారు, తదుపరి విచారణ తర్వాత వారిని తిరిగి స్వదేశాలకు పంపే (Deportation) ప్రక్రియ ప్రారంభం కానుంది.