తెలుగు సినీ పరిశ్రమను వణికించిన పైరసీ వెబ్సైట్ ఐబొమ్మ (iBomma) నిర్వాహకుడు ఇమ్మడి రవి విచారణలో సంచలన విషయాలను వెల్లడించాడు. 12 రోజుల పోలీస్ కస్టడీలో భాగంగా సైబర్ క్రైమ్ పోలీసులు గురువారం చంచల్గూడ జైలు నుంచి అతడిని అదుపులోకి తీసుకుని విచారించగా, సినిమాలను ఏ విధంగా పైరసీ చేసేవాడో పూసగుచ్చినట్లు వివరించాడు. కేవలం థియేటర్లలో రికార్డ్ చేయడం మాత్రమే కాకుండా, ఏకంగా క్యూబ్ (Qube) నెట్వర్క్ను, శాటిలైట్ లింక్లను హ్యాక్ చేసి సినిమాలను హై డెఫినిషన్ (HD) ఫార్మాట్లో దొంగిలించినట్లు అంగీకరించాడు.
విచారణలో రవి తెలిపిన వివరాల ప్రకారం.. పైరసీ చేసిన సినిమాలను విక్రయించడానికి అతడు ‘హెచ్డీ హబ్’ (HD Hub) పేరుతో ఒక ప్రత్యేక టెలిగ్రామ్ ఛానల్ను నడిపించేవాడు. ఈ ఛానల్ ద్వారా ఒక్కో పైరసీ లింక్ను 100 నుండి 300 డాలర్ల (సుమారు ₹8,000 నుండి ₹25,000) వరకు విక్రయించి భారీగా సొమ్ము చేసుకున్నాడు. ఇటీవల విడుదలైన ‘హిట్-3’, ‘కిష్కిందపురి’ వంటి చిత్రాలను నేరుగా శాటిలైట్ లింక్ ద్వారానే హ్యాక్ చేసి రికార్డ్ చేసినట్లు విచారణలో తేలింది. దీనివల్ల చిత్ర పరిశ్రమకు కోట్లాది రూపాయల నష్టం వాటిల్లింది.
ప్రస్తుతం సైబర్ క్రైమ్ పోలీసులు రవి వెనుక ఉన్న ఇతర వ్యక్తులు మరియు అతడికి సాంకేతిక సహకారం అందించిన వారి కోసం ఆరా తీస్తున్నారు. అతడు సంపాదించిన అక్రమ సొమ్మును ఎక్కడెక్కడ పెట్టుబడి పెట్టాడు, విదేశాల్లో ఎవరితోనైనా సంబంధాలు ఉన్నాయా అనే కోణంలోనూ దర్యాప్తు కొనసాగుతోంది. నాంపల్లి కోర్టు మూడు వేర్వేరు కేసుల్లో అతడిని విచారించేందుకు అనుమతించిన నేపథ్యంలో, రానున్న రోజుల్లో మరిన్ని కీలక విషయాలు వెలుగులోకి వచ్చే అవకాశం ఉంది. పైరసీకి వ్యతిరేకంగా టాలీవుడ్ పెద్దలు తీసుకుంటున్న చర్యల్లో భాగంగా ఈ అరెస్ట్ ఒక కీలక మలుపుగా భావిస్తున్నారు.