సినిమాల పైరసీ కేసులో ఇప్పటికే అరెస్ట్ అయిన ఇమ్మడి రవి అలియాస్ ఐబొమ్మ రవికి మరో కేసులో షాక్ తగిలింది. హైదరాబాద్ పోలీసులు అరెస్ట్ చేసి, చంచల్గూడ జైలుకు తరలించిన ఇమ్మడి రవిని, తాజాగా సైబర్ క్రైమ్ పోలీసులు మరో కేసులో అదుపులోకి తీసుకున్నారు. కోర్టు ఆదేశాలతో చంచల్గూడ జైలులో ఉన్న ఇమ్మడి రవిని పోలీసులు పీటీ వారెంట్ జారీ చేసి అరెస్ట్ చేసి, కోర్టు ముందు ప్రవేశపెట్టారు.
ఇమ్మడి రవిపై ఇప్పటివరకు 5 కేసులు నమోదు అయినట్లు సమాచారం. ఐబొమ్మ, బప్పం టీవీ వంటి వెబ్సైట్లలో కొత్త సినిమాలను పైరసీ చేసి అప్లోడ్ చేస్తున్న ఇమ్మడి రవిని విదేశాల నుంచి హైదరాబాద్ రాగానే పక్కా ప్లాన్ ప్రకారం వల వేసి పోలీసులు గతంలో అరెస్ట్ చేశారు. ఈ నేపథ్యంలో, ఇప్పటికే పోలీసులు జరిపిన విచారణలో సరైన సమాధానాలు రాలేదని చెబుతూ, మరింత లోతైన దర్యాప్తు కోసం మరోసారి కస్టడీకి ఇవ్వాలని కోరుతూ కోర్టులో పిటిషన్ దాఖలు చేశారు.
పోలీసులు మరో 7 రోజుల పాటు తమ కస్టడీకి ఇమ్మడి రవిని ఇవ్వాలని కోర్టును అభ్యర్థించారు. అయితే, పోలీసుల కస్టడీ పిటిషన్పై కోర్టు రేపు (గురువారం) విచారణ జరపనుంది. మరోవైపు, ఇమ్మడి రవి తరఫు న్యాయవాదులు కూడా ఆయనకు బెయిల్ ఇవ్వాలని కోరుతూ కోర్టులో పిటిషన్ వేశారు, ఈ బెయిల్ పిటిషన్ కూడా విచారణకు రానుంది.