జూబ్లీహిల్స్ అసెంబ్లీ నియోజకవర్గం ఉప ఎన్నికల పోలింగ్ ఉదయం ప్రారంభమైంది. తమ ఓటు హక్కును వినియోగించుకోవడానికి ఓటర్లు పోలింగ్ కేంద్రాల వద్ద బారులు తీరారు. ఈ ఉప ఎన్నికలో మొత్తం 4.30 లక్షల మంది ఓటర్లు తమ ఓటు హక్కును వినియోగించుకోవాల్సి ఉంది. 2023 శాసనసభ ఎన్నికల్లో ఈ నియోజకవర్గంలో కేవలం 47 శాతం మాత్రమే పోలింగ్ నమోదైన నేపథ్యంలో, ఉప ఎన్నిక కావడంతో ఈసారి పోలింగ్ శాతం పెరుగుతుందని అధికారులు, రాజకీయ పార్టీలు భావిస్తున్నాయి.
ఉప ఎన్నిక ప్రశాంతంగా జరిగేందుకు అధికారులు భారీ బందోబస్తు ఏర్పాట్లను చేశారు. నియోజకవర్గంలో మొత్తం 226 సమస్యాత్మక పోలింగ్ కేంద్రాలను గుర్తించిన అధికారులు, ఈ ప్రాంతాల్లో పటిష్టమైన భద్రతను ఏర్పాటు చేశారు. మొత్తం 407 పోలింగ్ కేంద్రాల కోసం 2,600 మంది పోలింగ్ సిబ్బందిని నియమించారు. ప్రతి పోలింగ్ కేంద్రంలో ఐదుగురు సిబ్బంది ఉంటారు. సమస్యాత్మక కేంద్రాలను డ్రోన్ కెమెరాల ద్వారా పరిశీలించనున్నారు. అలాగే, 139 పోలింగ్ కేంద్రాల వద్ద డ్రోన్ కెమెరాలతో పరిస్థితిని ఎప్పటికప్పుడు పరిశీలిస్తున్నారు.
జూబ్లీహిల్స్ ఉప ఎన్నికల కోసం అధికారులు వెబ్ కాస్టింగ్ ద్వారా పోలింగ్ తీరును పర్యవేక్షిస్తున్నారు. అలాగే, ఫిర్యాదుల కోసం ప్రత్యేకంగా హెల్ప్ లైన్ 1950 నంబరును ఏర్పాటు చేశారు. ఈ ఎన్నికల విధుల్లో మొత్తం రెండు వేల మంది పోలీసులను నియమించారు. ఎన్నికల అధికారి సుదర్శన్ రెడ్డి తెలిపిన వివరాల ప్రకారం, ఏజెంట్లను మాత్రమే పోలింగ్ కేంద్రంలోకి అనుమతిస్తున్నారు. అభ్యర్థులు, వారు సూచించిన ఒకరికి మాత్రమే పోలింగ్ తీరును పర్యవేక్షించే అవకాశం ఉంది, ఈ ఎన్నిక పూర్తి నిఘా నీడలో జరుగుతోంది.